စစ်ကိုင်းတိုင်း၊ မုံရွာမြို့မှာ မတ် ၁၄ ရက် ဒီမနက် ၇ နာရီက စစ်ကောင်စီ လက်အောက်ခံ မြို့နယ်လဝကဦးစီးမှူး တဦးကို ပြည်သူ့ကာကွယ်ရေးတပ်ဖွဲ့ (PDF) က ဖမ်းဆီးခေါ်ဆောင်သွားတယ်လို့ မြို့ခံတွေဆီက သိရပါတယ်။
မုံရွာမြို့နယ် လဝက ဦးစီးမှူး ဦးအောင်မိုးဝင်းကို ဒီနေ့မနက် ၇ နာရီက PDF တွေက နေအိမ်မှာပဲ လာရောက်ဖမ်းဆီးသွားတာလို့ မြို့ခံတဦးက ပြောပါတယ်။
“ဒီနေ့မနက် လဝကရုံးမှာ စစ်သားတွေရော ရဲတွေရော ရောက်နေတယ်။ လဝကဦးစီးမှူးကို PDF တွေက ဖမ်းသွားလို့ဆိုပြီး ဝန်ထမ်းတွေကို စစ်မေးနေတယ်။”
လဝကဦးစီးမှူး ဦးအောင်မိုးဝင်းဟာ မုံရွာမြို့နယ် စစ်မှုထမ်းစာရင်း ကောက်ယူရေးအဖွဲ့မှာ အဖွဲ့ခေါင်းဆောင်တဦးလည်း ဖြစ်တယ်လို့ အုပ်ချုပ်ရေးနဲ့ နီးစပ်သူတဦးက ပြောပါတယ်။
“တိုင်းစစ်ဌာနချုပ်လည်းရှိတယ်၊ တိုင်းအစိုးရရုံးလည်းရှိတယ်၊ အဲ့လိုနေရာမှာ နေတဲ့သူကို PDF တွေက အိမ်ထဲထိ ဝင်ဖမ်းတယ်ဆိုတော့ လုံခြုံရေး ဘယ်လောက်ညံ့လဲဆိုတာ စဥ်းစားကြည့်၊ PDF တွေမြင်မှာစိုးလို့ ပုန်းရင်ပုန်းနေမှာ အဲ့လူတွေ။”
လတ်တလောမှာ စစ်ကောင်စီတပ်နဲ့ ရဲတွေက မုံရွာမြို့ပေါ်တဝိုက် လိုက်လံရှာဖွေနေပြီး စစ်ဆေးနေတယ်လို့ မြို့ခံတွေဆီက သိရပါတယ်။
မနေ့ကလည်း မုံရွာမြို့၊ ရုံကြီးရပ်ကွက်၊ ဗိုလ်ချုပ်လမ်းရှိ အင်းဝဘဏ် ဓားပြတိုက်ခံရပြီး ငွေသိန်း ၃၀၀ နဲ့အတူ ဘဏ်မန်နေဂျာကိုပါ ဖမ်းဆီးခေါ်ဆောင်သွားပါတယ်။
