ရှမ်းပြည်နယ်​မြောက်ပိုင်း လားရှိုးမြို့​လေဆိပ်ကို စစ်အာဏာရှင်တပ်က ပြုပြင်​နေတာ တနှစ်​ကျော်ကြာပြီ ဖြစ်​ပေမဲ့ မပြီးစီး​သေးဘူးလို့ ​ဒေသခံ​တွေဆီက သိရပါတယ်။

လားရှိုးလေဆိပ်ကို ပြီးခဲ့တဲ့နှစ် ​မေလဆန်းပိုင်းကစလို့ ပြုပြင်​နေတာဖြစ်​ပေမဲ့ လက်ရှိအချိန်ထိ လေဆိပ်အ​ဆောက်အအုံပဲ ပြီးစီးတာကို ​တွေ့ရပြီး ကျန်တာ​တွေက ပြုပြင်​နေဆဲလို့ ဆိုပါတယ်။

​လားရှိုးမြို့ ​ဒေသခံတ​ယောက်က “​လေဆိပ်အ​ဆောက်အအုံပဲ ပြုပြင်ပြီးစီး​သေးတာ ​တွေ့တယ်။ ကျန်တာက ပြင်နေကြဆဲပဲ။ ပြင်​နေတာလည်း နှစ်​ပေါက်​နေပြီ။ ဒီနှစ်ဆန်းပိုင်းက​တော့ ပြန်​ပြေးဆွဲမယ် သတင်းထွက်​သေးတယ်။ အခုသွားကြည့်​​တော့လည်း စစ်တပ်က ​ပြေးလမ်းမှာ မိုင်းရှာ​​နေတာ ​တွေ့တယ်” လို့ DVB ကို ​ပြောပါတယ်။

၂၀၂၄ ခုနှစ် ဇူလိုင်လအတွင်း ၁၀၂၇ စစ်ဆင်ရေးတိုက်ပွဲတွေကြောင့် လားရှိုးလေဆိပ်ကို ရပ်နားခဲ့ရသလို လားရှိုးမြို့ကိုလည်း ကိုးကန့်တပ် (MNDAA) က ထိန်းချုပ်ခဲ့တာ ဖြစ်ပါတယ်။

အဲဒီတိုက်ပွဲမှာ လက်နက်ကြီးကျည်​တွေ ကျရောက်ပေါက်ကွဲလို့ ပြေးလမ်းမျက်နှာပြင်​တွေ ပျက်စီးခဲ့ရသလို ခရီးသည်နားနေဆောင်၊ လေဆိပ်ရုံးခန်း အမိုး၊ နံရံနဲ့ မှန်​​တွေလည်း ပျက်စီးခဲ့ပါတယ်။

အဲဒီ​နောက် ၂၀၂၅ ခုနှစ် ဧပြီလမှာ တရုတ်အကူအညီနဲ့ စစ်တပ်က လားရှိုးမြို့ကို ပြန်ထိန်းချုပ်ပြီး မေလ ဒုတိယပတ်မှာ လေယာဉ်ပြေးလမ်း၊ အဆောက်အအုံ​တွေကို စတင်ပြုပြင်ခဲ့တာ ဖြစ်ပါတယ်။