စစ်ကိုင်းတိုင်း၊ အင်းတော်မြို့နယ်မှာ ဖေဖော်ဝါရီ ၂၁ ရက်က တော်လှန်ရေးတပ်ဖွဲ့တွေနဲ့ ဆက်စပ် စွပ်စွဲချက်နဲ့ အရပ်သားပြည်သူ ၇ ဦးကို စစ်ခုံရုံးက ထောင်တသက် အပါအဝင် နှစ်ရှည် ပြစ်ဒဏ်တွေ ချမှတ်ခဲ့တယ်လို့ ဒေသခံတွေထံကသိရပါတယ်။
တော်လှန်ရေးတပ်ဖွဲ့တွေကို ရိက္ခာ၊ ငွေကြေး ထောက်ပံ့တယ် စွပ်စွဲချက်နဲ့ အောင်မိုင် အောင်ကိုကိုလွင်နဲ့ ရာဇာထွန်း တို့ကို အကြမ်းဖက်မှုတိုက်ဖျက်ရေး ဥပဒေ ၅၀(ည)၊ ၅၂(က) ထောင်တသက် ချမှတ်ပြီး နောက်ထပ် ပြည်သူ ၄ ဦးကိုလည်း အလုပ်ကြမ်းနဲ့ ထောင်ဒဏ်အသီးသီး ချမှတ်လိုက်တယ်လို့ ဒေသခံက ပြောပါတယ်။
အင်းတော်ဒေသခံ အမျိုးသားတဦးက “ထောင်တသက် ချမှတ်ခံရတဲ့သူက ၃ ဦးရှိတယ်။ အင်းတော်က ကိုရာဇာထွန်း၊ နဘားက အောင်ကိုကိုလွင် တို့ကို KIA/PDF နဲ့ ဆက်စပ်တယ်ဆိုပြီး ထောင်တသက်ချတယ်။ နောက် အောင်မိုင် ဆိုတဲ့ တယောက်ကိုလည်း ထောင်တသက်ချတယ်။ ကျန်တဲ့ လေးဦးကိုလည်း အလုပ်ကြမ်းနဲ့ နှစ်ရှည် ထောင်ဒဏ်တွေ ချလိုက်တယ်”လို့ ပြောပါတယ်။
ဒါ့အပြင် ကိုအောင်မိုင်နဲ့အတူ တွဲဖက်ဖမ်းဆီးရသူ နိုင်နိုင်ကို အကြမ်းဖက်သမားတွေ ရှိကြောင်း သတင်းပေးပျက်ကွက်တယ်ဆိုပြီး အလုပ်ကြမ်းနဲ့ ထောင်ဒဏ် ၇ နှစ်၊ တော်လှန်ရေး တပ်ဖွဲ့ဝင်တွေကို လူသစ်စုဆောင်းပေးတယ် ဆိုတဲ့ စွပ်စွဲချက်နဲ့ စိုးပြည့်လျှံ၊ ထွန်းထွန်းနိုင် တို့ကို အလုပ်ကြမ်းနဲ့ ထောင်ဒဏ် ၅ နှစ်နဲ့ ဓားဦးချွန်တချောင်း ကိုင်ဆောင်ခဲ့သူ ညီညီလင်းထွဋ် ကို အလုပ်ကြမ်းနဲ့ ထောင်ဒဏ် ၃ နှစ် အသီးသီး ချမှတ်ခဲ့ပါတယ်။
စစ်အုပ်ချုပ်ရေး ကြေညာထားတဲ့ အင်းတော်မြို့မှာ ၂၀၂၃ ခုနှစ် အောက်တိုဘာ ၂၃ ရက်ကလည်း CDM ကျောင်းဆရာတယောက်အပါအဝင် ပြည်သူ သုံးယောက်ကို စစ်ကောင်စီက ထောင်ဒဏ် တသက် အပါအဝင် နှစ်ရှည်ထောင်ဒဏ်တွေ ချမှတ်ခဲ့ပါတယ်။
