ဧရာဝတီတိုင်း၊ ပုသိမ်မြို့နယ်မှာရှိတဲ့ ရပ်ကွက်တွေမှာ စစ်မှုထမ်းဖို့အတွက် အိမ်ထောင်စု စာရင်းတွေကို ဖေဖော်ဝါရီ ၁၄ ရက်ကစတင်ပြီး ကောက်ခံနေတယ်လို့ ဒေသခံတွေက ပြောပါတယ်။
ပုသိမ်မြို့ အမှတ် ၃ ရပ်ကွက်နဲ့ အမှတ် ၁၁ ရပ်ကွက်တွေမှာရှိတဲ့ နေအိမ်တွေကို ဖေဖော်ဝါရီ ၁၄ ရက်ကစပြီး ရာအိမ်မှူး၊ ဆယ်အိမ်မှူးတွေက စစ်မှုထမ်းဖို့အတွက် အိမ်ထောင်စုစာရင်းနဲ့ တိုက်ပြီး လက်ရှိနေထိုင်သူစာရင်းကို ကောက်ခံနေပါတယ်။
အမှတ် ၃ ရပ်ကွက်မှာ နေထိုင်သူတဦးက “အိမ်ထောင်စုစာရင်းနဲ့ အခုနေထိုင်တဲ့သူတွေနဲ့ တိုက်စစ်ပြီး အမျိုးသားဘယ်လောက်၊ အမျိုးသမီးဘယ်လောက်၊ ကလေးဘယ်လောက်ဆိုပြီး ကောက်သွားတာ။ အိမ်မှာနေထိုင်တဲ့သူ စာရင်းကော မရှိတဲ့သူစာရင်းပါ သတ်သတ်စီမှတ်ပြီး ကောက်သွားတာ။ စစ်မှုထမ်းဖို့လို့တော့မပြောဘူး၊ ဒီတိုင်းပဲ စာရင်းတွေကောက်တာလို့ ပြောတယ်” လို့ ပြောပါတယ်။
ပုသိမ်မြို့ ဘုရားကုန်းကျေးရွာမှာ ဖေဖော်ဝါရီ ၁၃ ရက် ည ၁၀ နာရီကျော်က အလုပ်ကပြန်လာတဲ့ အမျိုးသား ၃ ဦးကို စစ်ကောင်စီတပ်သားတွေက ဖမ်းဆီးသွားပြီးနောက် မိသားစုနဲ့ အဆက်အသွယ် ပြတ်တောက်နေပါတယ်။
ပုသိမ်မြို့မှာ ညမထွက်ရအမိန့်ကို ည ၁၂ နာရီမှ မနက် ၄ နာရီအထိ ထုတ်ထားပေမဲ့ ည ၉ နာရီနောက်ပိုင်း ဖမ်းဆီးခံရတာတွေရှိနေပြီး ဖမ်းဆီးခံရတဲ့သူ အများအပြားဟာ မိသားစုနဲ့ အဆက်အသွယ် ပြတ်နေတယ်လို့ ပုသိမ်မြို့ခံတဦးက ပြောပါတယ်။
“ညမထွက်ရအမိန့်နဲ့ ဖမ်းတယ်ဆိုပြီး ဖမ်းသွားတာ။ ပြီးရင် အဆက်အသွယ်မရတဲ့သူတွေက များတယ်။ အဲ့ဒါက အခု စစ်မှုမထမ်းမနေရအမိန့် မထုတ်ခင်တည်းက ဖမ်းခံနေရတာ။ အခု အဲဒီအမိန့် ထပ်ထုတ်လိုက်တော့ ည ၈ နာရီကျော်ရင် အများစုက အပြင်မထွက်ကြတော့ဘူး” လို့ ပြောပါတယ်။
ပုသိမ်မြို့ အနောက်တောင်တိုင်းစစ်ဌာနချုပ်မှာလည်း သတ်လတ်ပိုင်း အမျိုးသားတွေကို ဖေဖော်ဝါရီ ၁၁ ရက်က ဖောကားတွေနဲ့ တင်ဆောင်လာပြီး ပြည်သူ့စစ်သင်တန်း ပေးနေတယ်လို့ ဒေသခံတွေက ပြောပါတယ်။
