စစ်ကိုင်းတိုင်း၊ ကလေးမြို့၊ ကံပုလဲရွာက ကြံ့ခိုင်ရေးပါတီဝင် အမျိုးသမီးတယောက်ကို ဖေဖော်ဝါရီ ၁၀ ရက်နေ့မနက်အစောပိုင်း ၁ နာရီဝန်းကျင် ကလေး PDF က ဖမ်းဆီးခဲ့တယ်လို့ တော်လှန်ရေးအင်အားစုတွေက ပြောပါတယ်။
ဖမ်းဆီးခံရတဲ့အမျိုးသမီးဟာ ကံပုလဲရွာသူ အသက် ၄၃ နှစ်အရွယ် ကြံ့ခိုင်ရေးပါတီဝင် ဒေါ်သီသီအေးဖြစ်ပြီး သူ့ရဲ့ အမျိူသားက စစ်ကောင်စီတပ်က တပ်ကြပ်ဖြစ်သလို လူမှုကွန်ယက်စာမျက်နှာပေါ်မှာ တပ်မတော်ထောက်ခံကြောင်းတွေ မကြာခဏ ရေးသားလေ့ရှိပြီး တော်လှန်ရေးအင်အားစုတွေနဲ့ အတိုက်အခံဖြစ်လေ့ရှိပါတယ်။
ကလေးမြို့ တော်လှန်ရေးအင်အားစု အဖွဲ့ဝင်တယောက်က “ဖမ်းဆီးရမိတာ ဟုတ်ပါတယ်။ ညက ၁ နာရီလောက် ရွာထဲကအိမ်ထိ တက်ဖမ်းခဲ့တာ။ သူ့ဆီက ဓား ၁ လက်၊ ပိုက်ဆံအိတ်နဲ့ ဖုန်းကို သိမ်းဆည်းခဲ့တယ်။ သူ့ကို ကောင်းမွန်စွာနဲ့ ရိုက်နှက်တာမရှိဘဲ ခေါ်ဆောင်ခဲ့တာပါ” လို့ ဒီဗွီဘီကို အတည်ပြုပြောပါတယ်။
လက်ရှိမှာ ဖမ်းဆီးရမိတဲ့ ဒေါ်သီသီအေးကို ကလေးမြို့ တော်လှန်ရေးအင်အားစုဘက်က စစ်ဆေးနေတယ်လို့ သိရပါတယ်။
ဒေါ်သီသီအေးဟာ ဂန့်ဂေါမြို့နယ်၊ မြောက်ခင်ရန်းရွာမှာ PDF ၂ ယောက် မီးရှို့သတ်ဖြတ်ခံရတာနဲ့ ပတ်သက်ပြီး သတင်းပေးလို့ သံသယရှိကြောင်း ပြောဆိုတာတေွ ရှိပေမဲ့ ကလေး ပကဖ ကတော့ ဒါကို အတည်မပြုသေးပါဘူး။
ဒါ့အပြင် ဒေါ်သီသီအေးကလည်း ဒါနဲ့ပတ်သက်လို့ သူမသိကြောင်းနဲ့ သူ့ပယောဂကြောင့် တဦးတယောက်မှ ဒုက္ခရောက်ရတာမရှိဘူးလို့ သူ့ရဲ့ ဖေ့စ်ဘွတ်ခ်မှာ ဖေဖော်ဝါရီ ၈ ရက်နေ့က ရေးသားထားပါတယ်။
ကြံ့ခိုင်ရေးပါတီဝင် ဒေါ်သီသီအေးဖမ်းဆီးခံရတာနဲ့ ပတ်သက်ပြီး ကံပုလဲရွာဘက်ကို ဒီဗွီဘီက ဆက်သွယ်ခဲ့ပေမဲ့ ဆက်သွယ်လို့မရခဲ့သလို စစ်ကောင်စီကလည်း သတင်းထုတ်ပြန်ထားတာ မရှိသေးပါဘူး။
ကံပုလဲကျေးရွာဟာ ကလေးမြို့နားမှာ တည်ရှိပြီး ကျေးရွာအတွင်းမှာ စစ်ကောင်စီက တပ်စွဲနေထိုင်သလို ရွာသားတချို့ကို စစ်သင်တန်းပေး၊ လက်နက်တပ်ဆင် ပေးထားတယ်လို့ သိရပြီး ပျူစောထီးကျေးရွာဖြစ်တဲ့ နှောညောင်ပင်ရွာနဲ့ ကပ်လျက်မှာ ရှိပါတယ်။
ဓာတ်ပုံ-မယ်သီ Facebook
