မကွေးတိုင်း၊ ဂန့်ဂေါမြို့နယ်၊ မြောက်ခင်ရန်းပျူစောထီးရွာမှာ PDF ၂ ယောက် အရှင်လတ်လတ် မီးရှို့သတ်ဖြတ်ခံရတဲ့သတင်းကို ဖေ့ဘွတ်စ်လူမှုကွန်ရက်စာမျက်နှာမှာ ပြန်မျှဝေခဲ့တဲ့ မန္တလေးမြို့က အမျိုးသမီးတယောက်ကို ဖေဖော်ဝါရီ ၈ ရက်နေ့မှာ စစ်ကောင်စီက ဖမ်းဆီးလိုက်ကြောင်း စစ်ကောင်စီထောက်ခံတဲ့ တယ်လီဂရမ် စာမျက်နှာတွေမှာ ရေးသားဖော်ပြကြပါတယ်။

အသက် ၁၈ နှစ်အရွယ် မယွန်းစန္ဒီမောင်က မြောက်ခင်ရန်းရွာမှာ လူငယ် ၂ ယောက် အရှင်လတ်လတ် မီးရှို့သတ်ဖြတ်ခံရတဲ့ သတင်းကို သူ့ရဲ့ဖေ့ဘွတ် လူမှုကွန်ရက် စာမျက်နှာမှာ မျှဝေရင်း ‘နောက်ဘဝကျရင် အေးချမ်းတဲ့နိုင်ငံတွေမှာ လူဖြစ်ပါစေ’ လို့ ဆုတောင်းခဲ့တာဖြစ်ပါတယ်။

ယွန်းစန္ဒီမောင်ကို မန္တလေးမှာရှိတဲ့ သူ့နေအိမ်မှာ ဝင်ရောက်ဖမ်းဆီးခဲ့တာလို့သိရပြီး လက်ထိပ်ခတ်ဖမ်းဆီးခံထားရတဲ့ ဓာတ်ပုံတွေနဲ့အတူ စစ်တပ်ဝါဒဖြန့် တယ်လီဂရမ် စာမျက်နှာတွေမှာ ဖေဖော်ဝါရီ ၈ ရက်နေ့က ဖြန့်ဝေထားတာပါ။

မယွန်းစန္ဒီမောင် အဖမ်းခံရတာနဲ့ပတ်သက်လို့ ဒီဗွီဘီအနေနဲ့ သီးခြားအတည်မပြုနိုင် သေးပါဘူး။

အရှင်လတ်လတ် မီးရှို့သတ်ဖြတ်ခဲ့တဲ့ ရုပ်သံဖိုင်ဟာ ဖေဖော်ဝါရီ ၆ ရက်နေ့က လူမှုကွန်ရက်မှာ ပျံ့နှံ့လာခဲ့ပြီးနောက် ယောဒေသကာကွယ်ရေးတပ်ဖွဲ့ကလည်း သူတို့တပ်ဖွဲ့ဝင် ၂ ယောက် ဖမ်းဆီးခံခဲ့ရပြီး ပျူစောထီးတွေက သတ်ဖြတ်ခဲ့ကြောင်း ပြောထားပါတယ်။