ချီလီသမ္မတဟောင်း ဆီဘက်စတီယန် ပင်ညဲရာဟာ နိုင်ငံတောင်ပိုင်းမှာ ဖေဖော်ဝါရီ ၆ ရက်က ရဟတ်ယာဉ်ပျက်ကျမှုအတွင်း သေဆုံးသွားခဲ့ကြောင်း လက်ရှိအစိုးရ အရာရှိ ၂ ဦးနဲ့ ပင်ညဲရာရဲ့ အကြံပေးဟောင်းတဦးတို့က ရိုက်တာသတင်းကို အတည်ပြုပါတယ်။
၂၀၁၀-၂၀၁၄ အထိနဲ့ ၂၀၁၈-၂၀၂၂ အထိ သက်တမ်းနှစ်ကြိမ် ထမ်းဆောင်ခဲ့တဲ့ အသက် ၇၄ နှစ်အရွယ် သမ္မတဟောင်း ကွယ်လွန်ကြောင်း ဒေသတွင်း မီဒီယာတွေက အစောပိုင်းမှာ ဖော်ပြခဲ့ပါတယ်။
ပင်ညဲရာ ဟာ ရဟတ်ယာဉ်ပျက်ကျမှုမှာ အသက်ရှင်ကျန်ရစ်ခြင်း မရှိပေမဲ့ ရဟတ်ယာဉ်ပေါ်ရှိ တခြားလူ ၃ ဦးကိုတော့ ကယ်ဆယ်နိုင်ခဲ့ကြောင်း အကြံပေးဟောင်းပုဂ္ဂိုလ်က ရိုက်တာကို ပြောပါတယ်။
ချီလီနိုင်ငံတောင်ပိုင်း လာဂိုရန်ကိုမြို့က ရေကန်ကြီးထဲကို ရဟတ်ယာဉ်ပျက်ကျမှု ဖြစ်ပွားခဲ့ရာ လူတစ်ဦး သေဆုံးပြီး သုံးဦး ဒဏ်ရာရရှိခဲ့ကြောင်း ချီလီ အမျိုးသားသဘာဝဘေးအန္တရာယ် အေဂျင်စီ SENAPRAD က အတည်ပြု ပြောပါတယ်။
အခင်းဖြစ်ပွားရာနေရာကို ကယ်ဆယ်ရေးဝန်ထမ်းတွေ ရောက်ရှိပြီး မကြာခင်မှာပဲ သမ္မတဟောင်း သေဆုံးသွားကြောင်း ကြေညာခဲ့ပါတယ်။
ကျန်ခရီးသည် ၃ ဦး အသက်ရှင် လွတ်မြောက်ခဲ့ပြီး သမ္မတဟောင်း ပင်ညဲရာဟာ ရဟတ်ယာဉ်ကို မောင်းနှင်သူဖြစ်ကြောင်း သတင်းရင်းမြစ် နှစ်ခုက ရိုက်တာကို ပြောပါတယ်။
ပင်ညဲရာဟာ ချီလီနိုင်ငံရဲ့ တောင်ဘက်ခြမ်းရှိ လှပတဲ့ ရေကန်တွေအနီးမှာ တောင်ကမ္ဘာခြမ်း နွေရာသီကို မကြာခဏ ကုန်ဆုံးလေ့ရှိခဲ့ပြီး သူ့ကိုယ်ပိုင် ရဟတ်ယာဉ်ကို မကြာခဏ မောင်းနှင်လေ့ရှိပါတယ်။
ဖေဖော်ဝါရီ ၆ ရက်က ရဟတ်ယာဉ်ပျက်ကျပြီး သေဆုံးသွားတဲ့ သမ္မတဟောင်း ဆီဘက်စတီယန် ပင်ညဲရာအတွက် လက်ရှိ ချီလီသမ္မတ ဂယ်ဘရီယလ် ဘောရစ်ခ်က နိုင်ငံတော်ဝမ်းနည်းခြင်း ကာလ ၃ ရက်တာ သတ်မှတ်ကြောင်း ကြေညာပါတယ်။
သမ္မတသက်တမ်း နှစ်ဆက် တာဝန်ထမ်းဆောင်ခဲ့တဲ့ သမ္မတဟောင်းအတွက် နိုင်ငံတော်ဈာပနကို ဖေဖော်ဝါရီ ၉ ရက် သောကြာနေ့မှာ ကျင်းပဖို့လည်း ပြင်ဆင်နေပါတယ်။
Source/Photo-Reuters
