ချင်းပြည်နယ်၊ မတူပီမြို့နယ်မှာ စစ်ကြောင်းထိုးလာတဲ့ စစ်ကောင်စီစစ်ကြောင်းကို မတူပီမြို့နယ်၊ ချန်းပြန်းရွာနားမှာ မိုင်းဆွဲတိုက်ခိုက်လို့ အနည်းဆုံး စစ်ကောင်စီတပ်သား ၆ ယောက် ဒဏ်ရာ အပြင်းအထန်ရခဲ့ပြီး မင်းတပ်-မတူပီလမ်းကို အသုံးပြုခွင့် ပိတ်ထားတယ်လို့ CDF မတူပီက ထုတ်ပြန်ပါတယ်။ ဖေဖော်ဝါရီလ ၁ ရက်နေ့ ညနေ ၆ နာရီလောက်က မတူပီ-ပလက်ဝ လမ်းမပေါ်မှာ တပ်စွဲထားတဲ့ ခလရ ၃၀၄ တပ်ရင်းကနေ ကျေးရွာတွေဘက်ကို အင်အား ၂၀၀ လောက်နဲ့ စစ်ကြောင်းထိုးလာတာကို ပဒေသာမိုင်းဆွဲ တိုက်ခိုက်ခဲ့တာဖြစ်ပါတယ်။
CDF - မတူပီပြောရေးဆိုခွင့်ရှိသူ ဆလိုင်းနိုင်ဂျွန်ကိမ်းက “ထိခိုက်တာက ၆ ဦး ပြင်းထန်စွာ ဒဏ်ရာရတယ်။ အဲဒီထဲက တဦးက ခြေထောက် ၂ ဖက်လုံးပြတ်တယ်။ တယောက်က ခြေထောက်တဖက်ပြတ်တယ်။ နောက်တယောက်က မျက်စိထိတယ်။ ၃ ဦး ပြင်းထန်တဲ့ ဒဏ်ရာဆိုတော့ ၆ ဦးပေါ့။ အသက်အန္တရာယ်စိုးရိမ်ရတယ်လို့ အတည်ပြုလို့ရတယ်။ ဒဏ်ရာရသူက အတော်များတယ်။ ဒီ ၆ ဦးက ပြင်းထန်တယ်” လို့ ပြောပါတယ်။
စစ်ကြောင်းက စစ်ကောင်စီတပ်သား အင်အား ၁၀၀ လောက်ဟာ မတူပီမြို့ပေါ်ကို ပြန်လည်ဆုတ်ခွါသွားပြီး အင်အား ၁၀၀ လောက်ကတော့ ချန်းပြန်းကျေးရွာမှာ ကျန်ရှိနေခဲ့ပြီး ဖေဖော်ဝါရီ ၂ ရက်နေ့မှာ ရွာကို မီးရှို့ဖျက်ဆီးလို့ ၅၀ လောက် မီးလောင်ပျက်စီးခဲ့တယ်လို့ သိရပါတယ်။
စစ်သားတွေ ကျန်နေပြီး CDF မတူပီနဲ့ အချိန်မရွေးတိုက်ပွဲဖြစ်နိုင်တဲ့အတွက် မတူပီ-မင်းတပ်လမ်းကို အသုံးပြုပြီး ခရီးထွက်တာ၊ တောထွက်တာနဲ့ ခြံသွားတာတွေ မပြုလုပ်ဖို့ ထုတ်ပြန်ထားပါတယ်။
