စစ်ကောင်စီရဲ့ စွန့်လွှတ်မိုင်းတွေနဲ့ စစ်လက်နက်အကြွင်းအကျန်ပစ္စည်းတွေဟာ အချိန်မရွေး ပေါက်ကွဲစေတတ်တာကြောင့် စစ်အသုံးအဆောင်ပစ္စည်းတွေနဲ့ လက်နက်ကြီး ကျည်ဆန်တွေကို ကိုင်တွယ်တာ၊ ထုနှက်တာ၊ ဆော့ကစားတာတွေ မပြုလုပ်ကြဖို့ ညီနောင်မဟာမိတ် ၃ ဖွဲ့က သတိပေးထုတ်ပြန်ထားပါတယ်။
ဖေဖော်ဝါရီ ၁ ရက်နေ့က နမ့်ဆန်မြို့နယ်၊ ဇယန်းကြီးရပ်ကွက်မှာ တိုက်ပွဲအတွင်း စစ်ကောင်စီက ပစ်ခတ်ပြီး မပေါက်ကွဲသေးတဲ့ လက်နက်ကြီး ၁ လုံးကို အသက် ၁၀ နှစ်ဝန်းကျင်အရွယ် ကလေးငယ် ၃ ယောက် ဆော့ကစားမိခဲ့ရာကနေ ပေါက်ကွဲလို့ ၃ ယောက်လုံး ပွဲချင်းပြီးသေဆုံးခဲ့ရပြီးနောက် မနေ့က သတိပေးချက်ထွက်လာတာပါ။
ညီနောင်မဟာမိတ် ၃ ဖွဲ့ ရဲ့ ဒေသအပြင် မြန်မာနိုင်ငံတဝန်း မိုင်းနင်းမှု၊ စစ်ကျန်လက်နက်ကြီးတွေ ပေါက်ကွဲမှုတွေကြောင့် အရပ်သားပြည်သူထိခိုက်ဒဏ်ရာရ သေဆုံးတာ မြင့်တက်နေပြီး ဒီအခြေအနေမှာ အရပ်သားပြည်သူတွေ သတိထားသွားလာကြဖို့နဲ့ မြို့ရွာတွေအတွင်းကို လက်နက်ကြီးတွေနဲ့ နေ့တိုင်းပစ်ခတ် တိုက်ခိုက်နေတာကြောင့်လည်း လက်နက်ကြီးကျည်ဆံတချို့ မပေါက်ကွဲသေးဘဲ ကျန်ရှိနေတတ်တယ်လို့ ညီနောင် ၃ ဖွဲ့က သတိပေးထားပါတယ်။
စစ်ပွဲအတွင်း လိုက်နာကျင့်သုံးရမယ့် ဂျနီဗာကွန်ဗင်းရှင်းကို မလိုက်နာဘဲ ဖောက်ဖျက်ကျူးလွန်လေ့ရှိတဲ့ စစ်ကောင်စီဟာ မြေမြှုပ်မိုင်း၊ နင်းမိုင်း၊ စွန့်လွှတ်မိုင်း၊ တိုက်မိုင်းနဲ့ ထောင်မိုင်းတွေကို စစ်တပ်စခန်းအနီးတွေမှာတင်မဟုတ်ဘဲ အရပ်သားပြည်သူတွေနေထိုင်ရာ မြို့၊ ရပ်ရွာတွေ၊ စာသင်ကျောင်းတွေနဲ့ သာသနိကအဆောက်အအုံတွေရှိရာ နေရာတွေအပါအဝင် အများပြည်သူသွားလာရာ နေရာတွေမှာပါ ထောင်တတ်ခဲ့တာ လွန်ခဲ့တဲ့ ၁၀ စုနှစ်ပေါင်း များစွာကတည်းက ဖြစ်ကြောင်းပြောထားပါတယ်။
