ရှမ်းပြည်နယ်မြောက်ပိုင်း၊ ပလောင်ကိုယ်ပိုင် အုပ်ချုပ်ခွင့်ရဒေသ၊ နမ့်ဆန်မြို့နယ်၊ ဇယန်းကြီးရွာမှာ ဖေဖော်ဝါရီ ၂ ရက် မနက် ၉ နာရီလောက်က လက်နက်ကြီးကျည်ပေါက်ကွဲပြီး ကလေး ၃ ဦး အခင်းဖြစ်နေရာမှာ သေဆုံးသွားတယ်လို့ ဒေသခံတွေက ပြောပါတယ်။
"ကလေးတယောက်က သူ့အမေခေါ်လို့ လှည့်ပြန်သွားတာပေါ့နော်။ ကလေး ၄ ယောက် ကျန်နေခဲ့တာ။ ကျန်နေခဲ့တော့ သူတို့က အဲမှာ ကောက်ရင်း ဆော့ရင်းနဲ့ အဲလက်နက်ကြီး ကျည်တွေ့လို့ သူတို့က အဲဟာထုဖို့ တယောက်က ကျောက်ခဲ သွားရှာတာ။ ကျောက်ခဲသွားရှာပြီး ပြန်တောင် မလာသေးဘူး။ အဲဒီဟာ ပေါက်သွားတာ။ ကလေးက ပွဲချင်းပြီး ၃ ယောက်။"
သေဆုံးသွားတဲ့ ကလေးတွေက အသက် ၆ နှစ်အရွယ် မိုင်းနေမင်းအောင်၊ အသက် ၁၀ နှစ်အရွယ် မိုင်းလှိုင်မင်းအောင် နဲ့ အသက် ၁၁ နှစ်အရွယ် မိုင်းအောင်ကျော်ဇော်တို့ဖြစ်တယ်လို့ PSLF/TNLA သတင်းနှင့် ပြန်ကြားရေးဌာနက သတင်းထုတ်ပြန်ထားပါတယ်။
"တခုလည်း ရှိတယ်၊ ဒီနမ့်ဆန်မှာ တား (TNLA တာဝန်ရှိသူတွေ) တို့ဘက်ကတော့ မိုင်းရှင်းလင်းရေးတွေတော့ လုပ်တယ်ပေါ့နော်။ ခရစ်ယာန် မူကြိုကျောင်း အဲမှာလည်း လက်နက်ကြီးကျလို့ မဖြုတ်ရသေးတဲ့ဟာ (မပေါက်သေးတဲ့ဟာ) ရှိတယ်ကွာ။ အဲဒါကြောင့် သူတို့ ကျောင်းမဖွင့်ရဲသေးဘူးတဲ့" လို့ ဒေသခံ နောက်တဦးက ပြောပါတယ်။
သေဆုံးသွားတဲ့ ကလေး ၃ ဦးဟာ ဇယန်းကြီးရွာ ပန်းပဲတန်း၊ ရပ်ကွက် ၇ မှာ နေထိုင်တဲ့ ကလေး တွေဖြစ်ကြောင်း တအာင်းအမျိုးသမီး အဖွဲ့အစည်းကလည်း သတင်းထုတ်ထားပါတယ်။
နမ့်ဆန်တိုက်ပွဲအတွင်း ကြွင်းကျန်နေတဲ့ စစ်ကျန် လက်နက်ပစ္စည်းတွေကို PSLF/TNLA က လိုက်လံ ရှင်းလင်းနေဆဲဖြစ်ပြီး တွေ့ရှိပါက သက်ဆိုင်ရာကို အကြောင်းကြားဖို့ ညွှန်ကြားထားတယ်လို့ ဆိုပါတယ်။
ပြီးခဲ့တဲ့ ၂၀၂၃ နိုဝင်ဘာ ၁၆ ရက်ကလည်း မူဆယ်ခရိုင်၊ မုံးကိုးမြို့၊ ရပ်ကွက် ၆ က ကျွဲ ကျောင်းသား ကလေး ၃ ဦးလည်း လယ်ကွင်းမှာ စစ်ကျန် လက်နက်ကြီးကျည် ပစ်ပေါက်ဆော့ကစားရာက သေဆုံးခဲ့ပါတယ်။
