မကွေးတိုင်း၊ မြိုင်မြို့နယ်၊ ကိုင်းတောမကျေးရွာ ရဲစခန်းကို ဇန်နဝါရီ ၃၀ ရက်က စတင်ကာ ဖေဖော်ဝါရီ ၁ ရက်အထိ ပစ်ခတ်တိုက်ခိုက်ခဲ့တယ်လို့ Earthquake People's Defense Force အဖွဲ့ကနေ သိရပါတယ်။
စစ်တပ်အာဏာသိမ်းတာ ၃ နှစ်ပြည့်တဲ့ ဖေဖော်ဝါရီ ၁ ရက်နေ့မှာ မြိုင်မြို့နယ် ကိုင်းတောမရဲစခန်းကို အနီးကပ် လက်နက်ငယ်နဲ့ အပြန်အလှန် ၄၅ မိနစ်ခန့် ပစ်ခတ်မှုဖြစ်ခဲ့တယ်လို့ Earthquake People's Defense Force အဖွဲ့ သတင်းပြန်ကြားရေးနဲ့ ပြင်ပဆက်ဆံရေး တာဝန်ခံ ကိုပိန်က ဆိုပါတယ်။
“အရင် ရှေ့နှစ်ရက်က လက်နက်ကြီးပစ်တာ၊ ဒီနေ့မနက် ၆ နာရီကနေ ၇ နာရီအထိ ကိုင်းတောမရဲစခန်းရဲ့ အရှေ့တောင်ဘက်က ဘန်ကာအထိ အနီးကပ်သွားပြီး လက်နက်ငယ်တွေနဲ့ ပစ်ခတ်တာ၊ သူတို့ဘက်က ရဲတကောင်ကျတယ်၊ ဘန်ကာထဲမဟုတ်ဘူး၊ ကတုတ်ကျင်းဘက်က တက်လာတဲ့ ရဲကို စနိုက်ပါနဲ့ ပစ်ခတ်ခဲ့တာ၊ လဲကျသွားတယ်။”
ကိုင်းတောမရဲစခန်းက ရဲတယောက် လဲကျသွားပြီး ၃ ယောက် ထိခိုက်ဒဏ်ရာ ရရှိခဲ့ပေမဲ့ ပြည်သူ့ကာကွယ်ရေးတပ်ဖွဲ့ဘက်က ထိခိုက်မှုမရှိခဲ့သလို စစ်တပ်ဘက်ကလည်း တိုက်ခိုက်ခံရပြီးနောက် ရဲစခန်းထဲကနေ ထွက်လာတာ မရှိဘူးလို့ သိရပါတယ်။
မြိုင်မြို့နယ်၊ ကိုင်းတောမကျေးရွာ ရဲစခန်းကို ဇန်နဝါရီ ၃၀ ရက်နေ့မှာ ညနေ ၄ နာရီကနေ ည ၈ နာရီအထိ လက်နက်ကြီးတွေနဲ့ တိုက်ခိုက်ခဲ့ရာမှာ စစ်တပ်ဘက်က ကျေးရွာတွေဘက်ကို ပြန်ပစ်ခတ်ခဲ့ပေမဲ့ ပြည်သူထိခိုက်မှု မရှိခဲ့ဘူးလို့ Earthquake People's Defense Force အဖွဲ့ သတင်းပြန်ကြားရေးနဲ့ ပြင်ပဆက်ဆံရေးတာဝန်ခံ ကိုပိန်က ဆိုပါတယ်။
ကိုင်းတောမရဲစခန်းကို ဇန်နဝါရီ ၃၁ ရက် မနက် ၆ နာရီကနေ ၈ နာရီအထိ လက်နက်ကြီးတွေနဲ့ အဝေးကနေ ပစ်ခတ်တိုက်ခိုက်ခဲ့တယ်လို့ ဆိုပါတယ်။
ကိုင်းတောမရဲစခန်းက နှစ်ရက်ဆက်တိုက် လက်နက်ကြီးနဲ့ ပစ်ခတ်ခံရမှုမှာ စခန်းတွင်း ထိခိုက်ခဲ့ပေမဲ့ လူအထိအခိုက် အတိအကျ အတည်မပြုနိုင်သေးပါဘူး။
သတင်းနဲ့ ပြန်ကြားရေးတာဝန်ခံ ကိုပိန်က“ဒီ အခု သုံးရက်ဆက်တိုက် မစ်ရှင်က စစ်အာဏာရှင် အမြစ်ပြတ်ဖို့ ဦးတည်တယ်။ အာဏာသိမ်းတာ ၃ နှစ်ပြည့်အနေနဲ့ ခွေးမောင်းပွဲအဖြစ် မဟာမိတ်ညီနောင်တွေနဲ့ ပူးတွဲဖော်ဆောင်ခဲ့တာပေါ့။ ရှေ့ဆက်ပြီးတော့လည်း ကျနော်တို့အနေနဲ့ စခန်းသိမ်းတိုက်ပွဲတွေ ဖော်ဆောင်ဖို့ ညီနောင်တွေနဲ့ အကောင်းဆုံးတိုင်ပင်ပြီး လုပ်ဆောင်နေပါတယ်” လို့ ပြောပါတယ်။
အဆိုပါတိုက်ခိုက်မှုတွေကို Pakokku People's Defence Force (PPDF)၊ မြိုင်ပကဖ တပ်ရင်း ၁ ခွဲ ၄ စကြာတပ်ဖွဲ့၊ ပခုက္ကူခရိုင် တပ်ရင်း ၂ နဲ့ Earthquake People's Defence Force တို့က ပူးပေါင်းတိုက်ခိုက်ခဲ့တယ်လို့ သတင်းထုတ်ပြန်ထားပါတယ်။
