ရှမ်းပြည်နယ်မြောက်ပိုင်း လားရှိုးမြို့နယ်မှာ စစ်ဘေးရှောင်စခန်းတွေ ရုပ်သိမ်းပြီး စစ်ရှောင်တွေ နေရပ်သွားပြီလို့ လားရှိုးမြို့အခြေစိုက် ကမ္ဘောဇ နာရေး၊လူမှုကူညီရေး နဲ့ ဆန်အလှူအသင်းက ပြောပါတယ်။
လာရှိုးမြို့အနီးကျေးရွာတွေ နဲ့ ရပ်ကွက်တွေမှာရှိတဲ့ ဒေသခံတွေဟာ ပြီးခဲ့တဲ့နှစ် အောက်တိုဘာ ၂၈ ရက်ကတည်းက စစ်ကောင်စီနဲ့ ညီနောင်မဟာမိတ် ၃ဖွဲ့တို့ တိုက်ပွဲတွေဖြစ်နေတာကြောင့် လာရှိးမြို့ပေါ်ရှိ စစ်ဘေးရှောင်စခန်းတွေနဲ့ ဘုန်းကြီးကျောင်းတွေမှာ စစ်ဘေးရှောင်နေရပါတယ်။
လာရှိုးမြို့ပေါ်ရှိ စစ်ဘေးရှောင်စခန်း ၅ ခု နဲ့ မြို့ပြင်ရှိ စစ်ဘေးရှောင်စခန်း ၁ ခုတို့မှ စစ်ဘေးရှောင် ၃၀၀၀ ကျော်ဟာ တိုက်ပွဲတွေ မရှိတော့တာကြောင့် ဇန်နဝါရီ ၂၃ ရက်ကစပြီး နေရပ်ကိုပြန်နေတဲ့အတွက် စစ်ဘေးရှောင်စခန်းတွေ ရုပ်သိမ်းခဲ့တာလို့ ကမ္ဘောဇ နာရေး၊ လူမှုကူညီရေး နဲ့ ဆန်အလှူအသင်း တာဝန်ရှိသူတဦးက ပြောပါတယ်။
"တိုက်ပွဲတွေ လောလောဆယ်မရှိတဲ့အတွက် စစ်ဘေးရှောင်ဒေသခံတွေက နေရပ်ပြန်သွာပြီး။ မြို့ပြင်မှာတော့ နည်းနည်းပါးပါးတော့ကျန်သေးတယ်။ မြို့တွင်း၊ မြို့ပြင် စစ်ဘေးရှောင်စခန်း ၆ ခုက စစ်ဘေးရှောင် ခန့်မှန်း ၃ ထောင်ကျော် သူတို့ရဲ့နေရပ်ကို ပြန်ပို့ပေးခဲ့ပါတယ်။ စစ်ဘေးရှောင်စခန်းတွေလည်း ဖြုတ်သိမ်းလိုက်ပြီ။ အခု လားရှိုးမှာ စစ်ဘေးရှောင်ဆိုလို့ မြို့ပြင်ဘုန်းကြီးကျောင်းမှာနေနေတဲ့ ၁၀၀ လောက်ပဲ ကျန်တော့တယ်။"
စစ်ကောင်စီက လားရှိုးမြို့ကို ည ၆ နာရီ မှ မနက် ၆ နာရီ ညမထွက်အမိန့်ထုတ်ထားပြီး မြို့တွင်းမှာလည်း အစစ်အဆေးတင်းကြပ်နေတယ်လို့ ဒေသခံတွေက ပြောပါတယ်။
ဇန်နဝါရီပထမပတ်မှာ ညီနောင်မဟာမိတ် ၃ ဖွဲ့က လောင်ကိုင်မြို့ကို သိမ်းပိုက်နိုင်ခဲ့ပြီးနောက် လာရှိုးမြို့ကို ဆက်လက်သိမ်းပိုက်ခံရမှာကို စိုးရိမ်တာကြောင့် ဒေသခံတွေ လားရှိုး-မိုင်းရယ်လမ်းမှတဆင့် ဘေးလွတ်ရာကို တိမ်းရှောင်ခဲ့ကြတာပါ။
