ချင်းပြည်နယ်၊ စီးယင်းနယ်မြေဒေသ၊ သိုင်းငင်းကျေးရွာ စခန်းသိမ်းတိုက်ပွဲမှာ ဒဏ်ရာရရှိခဲ့တဲ့ ချင်းကာကွယ်ရေးရဲဘော်တွေ ဆေးဝါးကုသဖို့ စရိတ်တွေ လိုအပ်နေတယ် လို့ CDF-CDM Siyin ဆီက သိရပါတယ်။

သိုင်းငင်းစခန်းသိမ်းတိုက်ပွဲအတွင်း ချင်းကာကွယ်ရေးပူးပေါင်းတပ်ဖွဲ့က ရဲဘော် အယောက် ၇၀ ကျော် ဒဏ်ရာရရှိခဲ့ပြီး ခွဲစိတ်ကုသဖို့လိုအပ်နေတဲ့ ရဲဘော် အယောက် ၄၀ ရှိတယ်လို့ သိရပါတယ်။

ဒဏ်ရာရရဲဘော်တွေအတွက် ခြေတုတပ်ဖို့နဲ့ အရိုးကျိုးလို့ သံမဏိချောင်းထည့်ဖို့ စတာတွေအတွက် ဆေးဝါးကုသစရိတ်ငွေကြေး လိုအပ်နေတာ ဖြစ်ပါတယ်။

ရဲဘော်တွေကို CNA/CNF ဌာနချုပ်က ဆေးရုံနဲ့  တပ်ရင်းအဖွဲ့ချုပ်တွေရဲ့ ဆေးရုံတွေမှာ ဆေးကုသပေးနေတာဖြစ်ပါတယ်။

CDF-CDM စီးယင်းတာဝန်ရှိသူတယောက်က “ခြေအတု စီစဉ်ပေးဖို့က ၄ ဦး ရှိပြီ။ လက်တဖက် ပြတ်သွားတာက ၁ ယောက်ရှိပါတယ်။ ခြေထောက် steel ထည့်ဖို့လိုတာက ၄ ယောက်ရှိပါတယ်။ ၁ ယောက်က ဦးနှောက်ညာဘက်က ကျည်ဝင်တာ ထုတ်လို့မရဘူး။ ကိုယ်ခန္ဓာဘယ်ဘက်ခြမ်း လှုပ်မရဘူး ဖြစ်နေပါတယ်” လို့ ပြောပါတယ်။

ကလေး-သိုင်းငင်းလမ်းမကြီးလျှောက်က သိုင်းငင်းကျေးရွာအခြေစိုက် စစ်ကောင်စီ စခန်းကို ဇန်နဝါရီ ၁၆ ရက်နေ့မှာ ချင်းကာကွယ်ရေးပူးပေါင်းတပ်ဖွဲ့တွေက တိုက်ခိုက်သိမ်းပိုက်ခဲ့တာ ဖြစ်ပါတယ်။