ဧရာဝတီတိုင်း၊ အင်္ဂပူမြို့နယ်၊ မဲဇလီကုန်းမြို့က ဒေသခံ အမျိုးသားလူငယ် ၂ ယောက်ကို စစ်ကောင်စီတပ်က နေအိမ်မှာ ဝင်ရောက်စီးနင်းဖမ်းဆီးပြီးနောက် PDF တွေနဲ့ ဆက်သွယ်နေတယ်လို့ စွပ်စွဲပြီး အကြမ်းဖက်ဥပဒေနဲ့ အမှုဖွင့်လိုက်တယ်လို့ ဒေသခံတွေဆီ သိရပါတယ်။
မနေ့ ဇန်နဝါရီ ၁၉ ရက်မှာ စစ်ကောင်စီတပ်နဲ့ ရဲတွေက နေအိမ်တွေအထိ လာဝိုင်း စီးနင်းပြီး သေနတ်ပစ်ဖောက် ဖမ်းဆီးခဲ့တာလို့ ဆိုပါတယ်။
ဖမ်းဆီးခံရသူ အသက် ၂၀ ကျော်အရွယ် ဒေသခံလူငယ် အမျိုးသား ၁ ယောက်နဲ့ အသက် ၂၅ နှစ်အရွယ် လူငယ်အမျိုးသား ၁ ယောက်ကို အင်္ဂပူမြို့နယ် ရဲစခန်းမှာ ချုပ်နှောင်ထားပြီး မနေ့ ဇန်နဝါရီ ၁၉ ရက် ညနေပိုင်းမှာ အကြမ်းဖက်မှုတိုက်ဖျက်ရေး ဥပဒေပုဒ်မဖြစ်တဲ့ ၅၀ (ဃ)နဲ့ တရားစွဲဆို အမှုဖွင့်လိုက်တာလို့ ရဲစခန်းနဲ့ နီးစပ်သူက ပြောပါတယ်။
“အရင်က တီဗွီတွေထဲမှာပဲ ရွာထဲဝင် သေနတ်နဲ့ပစ် ဓားပြတိုက်တာ မြင်ဖူးတာ။ မနေ့ကတော့ အပြင်မှာ မြင်လိုက်ရတယ်။ သေနတ်ပစ်ခတ်သံကြားလို့ သွားကြည့်တော့ လူငယ် ၂ ယောက်ကို စစ်တပ်နဲ့ ရဲတွေက လာဖမ်းတာတာ။ လာဖမ်းတဲ့ ရဲနဲ့ စစ်သားအင်အားက မနည်းဘူး။ လာဖမ်းတဲ့ ကလေးတွေက ပြေးလို့ပစ်တာလားဆိုတော့ မဟုတ်ဘူး။ သက်သက် ရမ်းသန်းပစ်သွားတာ။ သိက္ခာရှိတဲ့ အဖွဲ့အစည်းက လုပ်တာနဲ့မတူဘူး။ အကြမ်းဖက် ဓားပြတွေနဲ့ တူတယ်” လို့ ပြောပါတယ်။
ဖမ်းဆီးသွားတဲ့ ဒေသခံ လူငယ် ၂ ယောက်ဟာ လယ်သမား သား ၂ ယောက်ဖြစ်ပြီး စစ်တပ်နဲ့ ရဲတွေက အပြစ်မဲ့တဲ့သူတို့ကို ရိုက်နှက်စစ်ဆေး အတင်းအကျပ်ဝန်ခံခိုင်းမှာကို စိုးရိမ်နေတယ်လို့ ဒေသခံတွေက ဆိုပါတယ်။
လာဖမ်းတဲ့ စစ်ကောင်စီတပ်နဲ့ ရဲတွေဟာ မနေ့ ဇန်နဝါရီ ၁၉ ရက်နဲ့ ဒီနေ့မှာလည်း မဲဇလီ -ကွင်းကောက် လမ်းမပေါ်ကနေ ဖြတ်သန်းသွားလာနေတဲ့သူတွေကို တော်လှန်ရေး တပ်ဖွဲ့တွေ ဝင်ရောက်လာတာ သိ မသိကို မေးမြန်းစစ်ဆေးနေတယ်လို့လည်း သိရပါတယ်။
