အာဆင်နယ်အသင်းနဲ့ အပြောင်းအရွှေ့သတင်း ထွက်ပေါ်လာတဲ့အပေါ် အံ့အားသင့်မိကြောင်း စပိန်ကလပ် ဂီတာဖေးအသင်းတိုက်စစ်မှူး ဘော်ဟာမာယော်ရယ်က ပြောသွားပါတယ်။

အသက် ၂၆ နှစ်ရှိ စပိန်တိုက်စစ်မှူးဟာ အခုနှစ်ရာသီမှာ ခြေစွမ်းပြနေပြီး လာလီဂါ ၁၉ ပွဲမှာ ၁၂ ဂိုး သွင်းယူထားတာပါ။

သူ့ကိုခေါ်ယူဖို့ အာဆင်နယ်က ပေါင် ၂၂ သန်းနဲ့ ဆက်သွယ်ကမ်းလှမ်းခဲ့သလို ဘရန့်ဖို့ဒ်နဲ့ ဖူဟမ်အသင်းတွေကလည်း ခေါ်ယူလိုနေတယ်လို့ သတင်းထွက်ပေါ်ခဲ့တာပါ။

မာယော်ရယ်ကတော့ အပြောင်းအရွှေ့သတင်းတွေအပေါ် အံ့အားသင့်မိပြီး အေးဂျင့် အပါအဝင် ကလပ်အသင်းနဲ့ပါ အပြောင်းအရွှေ့ကိစ္စ မဆွေးနွေးရသေးကြောင်း ပြောပါတယ်။

ဂီတာဖေးအသင်းအပေါ်မှာပဲ အာရုံစိုက်ပြီး နေ့စဉ် လေ့ကျင့်မှုတွေ လုပ်ဆောင်နေကြောင်းလည်း မာယော်ရယ်က ပြောပါတယ်။

အရပ် ၅ ပေ ၁၁ လက်မရှိ တိုက်စစ်မှူး မာယော်ရယ်ဟာ ရီးရဲလ်မက်ဒရစ် အကယ်ဒမီထွက် ကစားသမားဖြစ်ပြီး ဝုဖ်ဘက်၊ လီဗန်တေး၊ ရိုးမားအသင်းတွေမှာ အငှားထွက်ကစားခဲ့ပြီး ၂၀၂၂ ခုနှစ်က ဂီတာဖေးအသင်းဆီ အပြီးသတ် ပြောင်းရွှေ့သွားခဲ့တာ ဖြစ်ပါတယ်။

Photo-Reuters