ရခိုင်ပြည်နယ်၊ ကျောက်တော်မြို့နယ်၊ တင်းမရွာနားမှာရှိတဲ့ တောင်ရှည်တောင် ဗျူဟာကုန်းက စစ်ကောင်စီတပ်သားအားလုံး ဇန်နဝါရီ ၆ ရက်နေ့ ည ၉ နာရီလောက်မှာ ရက္ခိုင့်တပ်တော် အေအေဆီမှာ လက်နက်ချခဲ့ကြတယ်လို့ ညီနောင်မဟာမိတ် ၃ ဖွဲ့က ဇန်နဝါရီ ၆ ရက်နေ့ ညပိုင်းမှာ ထုတ်ပြန်ပါတယ်။

အဲဒီဗျူဟာကုန်းကြီးကို ဒီဇင်ဘာ ၂၅ ရက်နေ့ မနက်ပိုင်းကစလို့ ရက္ခိုင့်တပ်တော် အေအေက ထိုးစစ်ဆင် တိုက်ခိုက်ခဲ့တာဖြစ်ပြီး ဇန်နဝါရီ ၅ ရက်နေ့မှာ စစ်ကောင်စီဘက်က ဂျက်တိုက်လေယာဉ်တစင်းနဲ့ ပေါင် ၂၀၀ ဗုံးကြဲချရာမှာ ကိုယ့်လူကို ထိမှန်ပြီး စစ်ကောင်စီတပ်သား ၁၀ ယောက်ထက်မနည်း သေဆုံးခဲ့တယ်လို့ အေအေနဲ့ နီးစပ်သူတယောက်က ဒီဗွီဘီကို ပြောပါတယ်။

ဒါနဲ့ပတ်သက်လို့ အသေးစိတ်ကို အေအေဘက်က ထုတ်ပြန်တာမရှိသေးဘဲ ကျောက်တော် ဒေသခံတယောက်ကတော့ “တင်းမကျေးရွာအနီးက တောင်ရှည်တောင် ဗျူဟာကုန်းကို သိမ်းပိုက်လိုက်ပြီး သတင်းတွေကို မနေ့ကတည်းက ကြားရတယ်။ အေအေ က ထိုးစစ်ဆင်တာကလည်း ကြာနေပြီဆိုတော့ ဗျူဟာအထိုင်ချ စစ်သားတွေလည်း သိပ်ကျန်မှာ မဟုတ်တော့ဘူး။ လေကြောင်းနဲ့ လက်နက်ကြီး ပစ်ကူတွေက ထိရောက်မှုမရှိတော့ ကျန်နေသေးတဲ့ စစ်သားတွေက လက်နက်ချ လိုက်ကြတာနဲ့ တူတယ်” လို့ပြောပါတယ်။

တောင်ရှည်တောင်ဗျူဟာကုန်းဟာ ကျောက်တော်အခြေစိုက် စကခ ၉ ကို အနောက်က ကာထားတဲ့ ဗျူဟာကုန်းဖြစ်တဲ့အတွက် စကခ ၉ လည်း မကြာခင် သိမ်းပိုက်ခံရနိုင်ခြေ ရှိတယ်လို့ သူက ဆက်ပြောပါတယ်။

ပြီးခဲ့တဲ့ ဇန်နဝါရီ ၁ ရက်နေ့ကတော့ တင်းမဗျူဟာကုန်းတခုကို ရက္ခိုင့်တပ်တော်(အေအေ)က သိမ်းပိုက်နိုင်ခဲ့ပြီး လက်နက်ခဲယမ်းတွေလည်း အများအပြား သိမ်းဆည်းရရှိခဲ့တယ်လို့ ဆိုပါတယ်။

အဲဒီဗျူဟာကုန်း မကျဆုံးဖို့အတွက် ကျောက်တော်အခြေစိုက် စခက ၉ တပ်မက အတွဲလိုက်ဒုံးတွေ၊ လက်နက်ကြီးတွေနဲ့ ပစ်ကူပေးခဲ့သလို လေကြောင်းကနေ ဂျက်တိုက်လေယာဉ်၊ Mi-35 ရဟတ်ယာဉ်တွေအပြင် ထောက်ပို့လေယာဉ်တွေဖြစ်တဲ့ Y-12/Y-8/Mi-17 တွေနဲ့ပါ ဗုံးကြဲတိုက်ခိုက်ခဲ့ကြတယ်လို့ ပြောပါတယ်။

စစ်ကောင်စီဘက်က လက်လွှတ်ဆုံးရှုံးခဲ့ရတဲ့ တောင်ရှည်တောင်ကို ဒီနေ့ ဇန်နဝါရီ ၇ ရက်နေ့ မနက် ၈ နာရီ ၄၅ မိနစ်မှာ မကွေးဘက်က ဂျက်တိုက်လေယာဉ်တစင်းနဲ့ ဗုံး ၄ လုံး ကြဲချခဲ့ပြီး ၈ နာနာရီ ၅၇ မိနစ်မှာလည်း နောက်ထပ် လေယာဉ်တစင်းနဲ့ ဗုံး ၁ လုံးထပ်ကြဲသလို စက်သေနတ်ပစ်ခတ်သံတွေလည်း ကြားနေရတယ်လို့ ဆိုပါတယ်။

အနီးအနားက ကျေးရွာတွေကိုလည်း လေကြောင်းက တိုက်ခိုက်ခဲ့တဲ့အတွက် အရပ်သား ၃ ယောက်ထက်မနည်း သေဆုံးခဲ့ပြီး ၁၀ ယောက်ကျော် ထိခိုက်ဒဏ်ရာရခဲ့ကြပါတယ်။

ပလက်ဝမြို့က စစ်ကောင်စီရဲ့ အဓိက အမာခံစခန်းကုန်းကြီးတွေဖြစ်တဲ့ စကခ ၉၊  တပ်မ ၁၁ ရှေ့တန်းတပ်မဌာနချုပ် ၂ ခု အပါအဝင် ပလက်ဝ-ကျောက်‌‌တော်အစပ် မီးဝဗျူဟာကုန်း က ကျန်ရှိနေသေးတဲ့ စခန်းတွေကိုလည်း အပြီးသတ် သိမ်းပိုက် နိုင်ရေးအတွက် ရက္ခိုင့်တပ်တော် (အေအေ)က ထိုးစစ်ဆင်တိုက်ခိုက်နေတယ်လို့ ညီနောင် မဟာမိတ် ၃ ဖွဲ့က ဆိုထားပါတယ်။ ရခိုင်နဲ့ ပလက်ဝဒေသတို့မှာ ရခိုင်တပ်တော်က သိမ်းပိုက်ရရှိထားတဲ့ စစ်ကောင်စီ တပ်စခန်း ၁၅၀ ကျော်ရှိနေပြီဖြစ်ပြီး ရခိုင်ဒေသအတွင်းက စစ်ကောင်စီတပ်သားတွေနဲ့ ရဲတပ်ဖွဲ့ဝင်တွေအနေနဲ့ အသက်မသေဘဲ မိသားစု၊ ဆွေမျိုး၊ မောင်နှမတွေနဲ့ ကောင်းမွန်စွာတွေ့ခွင့်ရလိုရင် နီးစပ်ရာ အေအေ စခန်းတွေကို အမြန်ဆုံးဆက်သွယ်ပြီး လက်နက်ချ အညံ့ခံဖို့ ရက္ခိုင့်တပ်တော် (အေအေ)က ဒီဇင်ဘာ ၂၉ ရက်နေ့မှာ သတိပေးထားပါတယ်။