ရခိုင်ပြည်နယ်၊ မင်းပြားမြို့နယ်မှာ ဇန်နဝါရီ ၄ ရက် မနက်ပိုင်းက စစ်ကောင်စီတပ်သားတွေ မိုင်းဆွဲတိုက်ခိုက်ခံရပြီး ၅ ယောက်ထက်မနည်း သေဆုံးကာ အများအပြား ဒဏ်ရာရရှိခဲ့တယ်လို့ အေအေနဲ့ နီးစပ်သူတွေဆီကနေ သိရပါတယ်။

မင်းပြားမြို့နယ်၊ ငစရိုင်းချောင်းတောင်တန်ဘက်က ဆင်းလာတဲ့ စစ်ကောင်စီရဲ့ ခြေလျင်စစ်ကြောင်းတခုကို ဇန်နဝါရီ ၄ ရက် မနက် ၁၀ နာရီခွဲလောက်မှာ ရက္ခိုင့်တပ်တော် (အေအေ) က မိုင်းဆွဲတိုက်ခိုက်ခဲ့တယ်လို့ အေအေနဲ့ နီးစပ်သူတယောက်က ဒီဗွီဘီကို ပြောပါတယ်။

အဲဒီတိုက်ခိုက်မှုကြောင့် စစ်ကောင်စီတပ်သား ၅ ယောက်ထက်မနည်း သေဆုံးခဲ့ပြီး အများအပြား ဒဏ်ရာရရှိသွားကြတယ်လို့ ဆိုပါတယ်။

စစ်ကောင်စီတပ်ဘက်က အထိနာသွားတာကြောင့် မင်းပြားမြို့ ရာမောင်တံတားနားက စစ်ကောင်စီရဲ့ စခန်းကုန်းကနေ ငစရိုင်းကျွန်းက မင်းရွာနားကို လက်နက်ကြီး လက်နက်ငယ်တွေနဲ့ ပစ်ခတ်ခဲ့ကြတယ်လို့ ပြောပါတယ်။

မင်းပြားမြို့မှာ ဇန်နဝါရီ ၂ ရက် မနက်ပိုင်းကလည်း စစ်ကောင်စီတပ်က လက်နက်ကြီးနဲ့ ပစ်ခတ်ခဲ့လို့ စာသင်ကျောင်း၊ ဘုန်းကြီးကျောင်းတွေ အပါအဝင် နေအိမ်အဆောက်အဦ ၁၀ လုံးလောက် ပျက်စီးခဲ့တယ်လို့ ဒေသခံတွေဆီကနေ သိရပါတယ်။

အဲဒီတိုက်ခိုက်မှုအတွင်းမှာ စစ်ကောင်စီဘက်က ထိခိုက်သေဆုံးတဲ့ အခြေအနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။

ရခိုင်ပြည်နယ်၊ စစ်တွေမြို့မှာ ဇန်နဝါရီ ၄ ရက် မနက်က ပြည်သူ ၆၀ ကျော်ကို စစ်ကောင်စီတပ်က ဖမ်းဆီးသွားတယ်လို့ ဒေသခံတွေဆီကနေ သိရပါတယ်။

စစ်တွေမြို့ ရွှေပြားစျေးနားမှာ ဇန်နဝါရီ ၄ ရက် မနက် ၃ နာရီခွဲလောက်မှာ စျေးရောင်း၊ စျေးဝယ်နဲ့ အလုပ်သမားတွေ အပါအဝင် ပြည်သူ ၆၀ ကျော်ကို စစ်ကောင်စီတပ်က အင်အားအလုံးအရင်းနဲ့ ဖမ်းဆီးသွားကြတယ်လို့ စစ်တွေမြို့ ဒေသခံတယောက်က ဒီဗွီဘီကို ပြောပါတယ်။

“အဲဒီ စစ်ကောင်စီတပ်သားတွေဟာ ဒေသခံပြည်သူတွေကို ကားနဲ့လိုက်တိုက်ပြီး ဖမ်းဆီးကြတာပါဗျ။ ကားနဲ့လိုက်တိုက်တာကြောင့် သေဆုံးသူတော့ မရှိပါဘူး။ စျေးဝယ်တဲ့သူတွေကိုပါ အားလုံးဖမ်းဆီးပြီး ကားပေါ်တင်ပြီး အမှတ် ၁ ရဲစခန်းဘက်ကို ခေါ်သွားကြတယ်။ စစ်ကောင်စီဘက်ကတော့ အပြစ်မဲ့ပြည်သူတွေကို အကြောင်းအမျိုးမျိုး ပြပြီး ဖမ်းဆီးနေကြတာပါ။ လက်ကိုင်ဖုန်းတွေကို စစ်ဆေးလို့ အေအေနဲ့ပတ်သက်တဲ့ပုံတွေ၊ အထောက်ထားတွေတွေ့ရင် ULA/AA လို့ စွပ်စွဲပြီး အမှုဖွင့်တာတွေရှိတယ်။ ဘာအထောက်ထားမှ ရှာမတွေ့ရင်တော့ ဒေသန္တရဥပဒေကို အကြောင်းပြပြီး အမှုဖွင့် အရေးယူတာတွေ ရှိတယ်။”

စစ်တွေမြို့မှာ ဇန်နဝါရီ ၁ ရက် မနက်ပိုင်းကလည်း ဒေသခံပြည်သူ ၁၂ ယောက်ကို စစ်ကောင်စီတပ်က ဖမ်းဆီးသွားတယ်လို့ ဒေသခံတွေဆီကနေ သိရပါတယ်။

ရခိုင်ပြည်နယ်အတွင်းမှာ ရက္ခိုင့်တပ်တော် (အေအေ) နဲ့ စစ်ကောင်စီတပ်တို့ တကျော့ပြန် တိုက်ပွဲတွေ ပြန်လည်ဖြစ်ပွားပြီးနောက် စစ်ကောင်စီဘက်က ဒေသခံပြည်သူ ၃၀၀ ကျော်လောက်ကို အေအေနဲ့ဆက်စပ်တယ်လို့ သံသယမှုအပြင် ဒေသန္တရဥပဒေတွေနဲ့ပါ ဖမ်းဆီးခဲ့ကြတယ်လို့ သိရပါတယ်။