မလေးရှားနိုင်ငံ၊ ပီရက်ပြည်နယ် အနောက်တောင်ဘက်မှာ ကမ်းခြေမှ ၁၅ မိုင်အတွင်း ငါးဖမ်းတာ၊ တရားမဝင် ဆက်သွယ်ရေးကိရိယာတွေ အသုံးပြုတာနဲ့ အထောက်အထား စာရွက်စာတမ်းတွေ မရှိတာတို့အတွက် မြန်မာနိုင်ငံသား ၄ ဦးအပါအဝင် ၅ ဦးကို ဒီဇင်ဘာ ၂၆ ရက်မှာ ဖမ်းဆီးခဲ့တယ်လို့ မလေးရှားကမ်းခြေစောင့်တပ်ဖွဲ့က ထုတ်ပြန်ပါတယ်။
ပီရက်ပြည်နယ် ရေကြောင်းညွှန်ကြားရေးမှူး မိုဟာမက် ဟမ်ဘလီ ဦးဆောင်တဲ့ ကမ်းခြေစောင့်တပ်ဟာ ဒီဇင်ဘာ ၂၆ ရက် ညနေ ၄ နာရီခွဲမှာ ပီရက်ရေပြင် အနောက်တောင်ဘက် ရေမိုင် ၁၀ မိုင်ခွဲမှာ ငါးဖမ်းနေတဲ့ မသင်္ကာဖွယ်ရာ လှေတစီးကို တွေ့ရှိတဲ့အတွက် ဖမ်းဆီးစစ်ဆေးခဲ့ပါတယ်။
လှေပေါ်မှာ မြန်မာနိုင်ငံသား ၄ ဦး၊ မလေးနိုင်ငံသားတဦးနဲ့အတူ တရားဝင် အထောက်အထား မပါတဲ့ ဆက်သွယ်ရေးပစ္စည်းတွေ တွေ့ရှိခဲ့ရပြီး မြန်မာနိုင်ငံသားတွေက အထောက်အထား စာရွက်စာတမ်း မပါရှိဘူးလို့ ရေကြောင်းညွှန်ကြားရေးမှူး မိုဟာမက် ဟမ်ဘလီက ပြောပါတယ်။
“ရေမိုင် ၁၅ မိုင်အတွင်းမှာ ငါးဖမ်းလုပ်ငန်း လုပ်ကိုင်တဲ့အပြင် ဆက်သွယ်ရေးကိရိယာ အသုံးပြုခွင့်အတွက်လည်း ထောက်ခံချက် မပြနိုင်ဘူး။ ဖမ်းဆီးသိမ်းဆည်းခဲ့တဲ့ ငါးဖမ်းသမား ၅ ဦး၊ လှေနဲ့အတူ ငါးဖမ်းကိရိယာတို့ကို မလေးရှားစုံစမ်းစစ်ဆေးရေးအရာရှိထံ အပ်နှံခဲ့ပါတယ်။”
ဖမ်းဆီးရမိခဲ့သူတွေကို စက်လှေမှာ အီလက်ထရောနစ်ပစ္စည်းတွေ အသုံးပြုခွင့်မရှိတဲ့ ငါးလုပ်ငန်းဥပဒေနဲ့ ကမ်းခြေမှ ၁၅ မိုင်အတွင်း ငါးဖမ်းခြင်းတို့အတွက် တရားစွဲဆိုခဲ့ပြီး မြန်မာနိုင်ငံသား ၄ ဦးကိုတော့ လူဝင်မှုကြီးကြပ်ရေး ဥပဒေနဲ့ပါ ထပ်မံတရားစွဲဆိုခဲ့တယ်လို့ မလေးရှား ကမ်းခြေစောင့်တပ်ဖွဲ့က ထုတ်ပြန်ပါတယ်။
