မကွေးတိုင်း၊ ဂန့်ဂေါမြို့နယ်တောင်ပိုင်း မြစ်သာမြစ်ပေါ်ရှိ ပျဉ်သာစခန်းသိမ်းတိုက်ပွဲမှာ CDF-မင်းတပ်က စစ်ကြောင်းမှူးတဦး ကျဆုံးခဲ့တယ်လို့ CDF-မင်းတပ်က ဒီဇင်ဘာ ၂၆ ရက်မှာ ထုတ်ပြန်ပါတယ်။
တိုက်ပွဲအတွင်း CDF-မင်းတပ်ရဲ့ စစ်ကြောင်းမှူးဖြစ်သူ အသက် ၂၀ အရွယ် ဆလိုင်းတမ်လိန်း ကျဆုံးခဲ့ပါတယ်။
CDF-မင်းတပ် ပြောရေးဆိုခွင့်ရှိသူ ဆလိုင်းဟာအွမ်က “သူက ကျနော်တို့တပ်ဖွဲ့က အရမ်းအားထားရတဲ့ စစ်ကြောင်းမှူးပေါ့နော်။ ဆောင်းကာလ သင်တန်းတွေ ဖွင့်တဲ့အခါ သင်တန်းဆရာတယောက်အနေနဲ့ တာဝန်ယူခဲ့တယ်ပေါ့နော်။ ရဲဘော်တိုင်းက ကျနော်တို့အတွက် အစားထိုးလို့မရပါဘူး။ သူကလည်း အဲ့ဒီထဲက တယောက်ပေါ့။ စခန်းသိမ်းပွဲမှာ စစ်ကြောင်းမှူးက သူကိုယ်တိုင် ဦးဆောင်ပြီးတော့မှ ဘန်ကာတွေကို တိုက်ခဲ့တာပေါ့။ စခန်းသိမ်းမှုမှာ သူက အဓိက အခရာကျခဲ့တယ်လို့ ပြောလို့ရတယ်” လို့ ပြောပါတယ်။
ချင်းပြည်နယ်နဲ့ မကွေးတိုင်းက စခန်းသိမ်းတိုက်ပွဲတွေမှာ ဒီဇင်ဘာလအတွင်း CDF-မင်းတပ်က ရဲဘော် ၄ ဦး ကျဆုံးခဲ့တယ်လို့ သိရပါတယ်။
