ချင်းပြည်နယ်၊ ပလက်ဝမြို့နယ်၊ ဆမီးမြို့ရဲစခန်းက ရဲ ၄ ယောက်ဟာ လက်နက်ခဲယမ်းတွေနဲ့အတူ အလင်းဝင်လာခဲ့ပြီး နောက်ထပ် အလင်းဝင်ဖို့ ဆက်သွယ်လာသူတွေလည်း ရှိတယ်လို့ ပလက်ဝ ကိုယ်ပိုင်အုပ်ချုပ်သောခရိုင်ကောင်စီက ထုတ်ပြန်ပါတယ်။

ဒီဇင်ဘာ ၂၃ ရက်မှာ ထုတ်ပြန်တာဖြစ်ပြီး ဆမီးမြို့ပေါ်ရဲစခန်းက တပ်ကြပ် ဦးလှထွန်း၊ တပ်ကြပ် ဦးယိုးသိန်း၊ ဒုတပ်ကြပ် ဦးလိုင်သိန်းနဲ့ တပ်သား ဦးပီတာလင်းတို့ဟာ ဒီဇင်ဘာ ၁၄ ရက်နေ့က ချင်းနယ်မြေ ကာကွယ်ရေးတပ်ဖွဲ့ - ပလက်ဝဆီကို အလင်းဝင်လာခဲ့တာလို့ ဆိုပါတယ်။

သူတို့မှာ G3 သေနတ် ၃ လက်၊ ကျည်ဘောက် ၇ ခု၊ ကျည်ဆန် အတောင့် ၄၈၀၊ 94 သေနတ် ၁ လက်၊ ကျည်ဘောက် ၂ ခု၊ ကျည်ဆန် အတောင့် ၂၀၀ တို့ ပါလာခဲ့ပြီး ပလက်ဝ ကိုယ်ပိုင်အုပ်ချုပ်သောခရိုင်ကောင်စီ ဥက္ကဋ္ဌက ဂုဏ်ပြုငွေ ချီးမြှင့်ခဲ့ပါတယ်။

နောက်ထပ် ပြည်သူ့ရင်ခွင်အလင်းဝင်မယ့် တပ်မတော်သား၊ ရဲတပ်ဖွဲ့ဝင်တွေကို လက်နက်ခဲယမ်း ပါပါ၊ မပါပါ လူသားချင်းစာနာထောက်ထားမှု အကူအညီတွေနဲ့ ဆုချီးမြှင့်သွားမယ်လို့လည်း ထုတ်ပြန်ထားပါတယ်။

ပြီးခဲ့တဲ့ ဒီဇင်ဘာ ၇ ရက်က ပလက်ဝမြို့နယ် ရှင်းလက်ဝ ရဲစခန်းမှာ တာဝန်ကျနေတဲ့ ဒေသခံ ရဲဝန်ထမ်း ၈ ယောက်ဟာ ပြည်သူနဲ့ရပ်တည်ဖို့ အလင်းဝင်လာခဲ့သလို နိုဝင်ဘာ ၂၉ ရက်ကလည်း ရှင်းလက်ဝကျေးရွာ အခြေစိုက် စစ်ကောင်စီ ဗျူဟာ- ၃၊ ခလရ- ၂၉၉ က ဒုတပ်ကြပ် ၁ ယောက်နဲ့ ရဲဘော် ၁ ယောက်တို့ အလင်းဝင်ခဲ့ပါသေးတယ်။

ပြည်သူ့ရင်ခွင်နဲ့ ချိတ်ဆက်အလင်းဝင်သူတွေကို လုံခြုံတဲ့နေရာတွေဆီ ပို့ဆောင်ထားပြီးပြီလို့လည်း ပလက်ဝ ကိုယ်ပိုင်အုပ်ချုပ်သောခရိုင်ကောင်စီက ထုတ်ပြန်ထားပါတယ်။