ချင်းပြည်နယ်၊ မတူပီမြို့နယ်၊ ထယ်ဘွေးရွာမှာ အထိုင်ချထားတဲ့ စစ်ကောင်စီတပ်စခန်းကို ချင်းကာကွယ်ရေးတပ်ဖွဲ့တွေက သိမ်းပိုက်ခဲ့တယ်လို့ CDF မတူပီထံက သိရပါတယ်။
ဒီဇင်ဘာ ၁၈ ရက် မနက် ၇ နာရီကတည်းက မတူပီ-ပလက်ဝ လမ်းမပေါ်မှာရှိတဲ့ ထယ်ဘွေးစခန်းကို ချင်းကာကွယ်ရေး ပူးပေါင်းတပ်ဖွဲ့တွေ ဝင်ရောက်တိုက်ခိုက်ခဲ့ရာ ည ၉ နာရီလောက်မှာ စစ်ကောင်စီတပ်သားတွေက စခန်းစွန့်ခွာ ထွက်ပြေးခဲ့တာ ဖြစ်ပါတယ်။
ဒီဇင်ဘာ ၁၉ ရက် မနက် ၉ နာရီလောက်မှာ စခန်းကို သိမ်းပိုက်လိုက်ပြီး နယ်မြေရှင်းလင်းရေး ပြုလုပ်နေတယ်လို့ CDF မတူပီ တာဝန်ရှိသူ နိုင်ဂျွန်ကိန်းက ပြောပါတယ်။
“၁၈ ရက်နေ့ မနက်ပိုင်းကနေ တောက်လျှောက်တိုက်တယ်။ တနေကုန် ညမှာရော တောက်လျှောက်တိုက်တော့ သူတို့က ည ၉ နာရီလောက်မှာ စခန်းစွန့်တယ်။ ၁၉ ရက်နေ့ ၉ နာရီကျတော့ ကျနော်တို့ စခန်းထဲဝင်ပြီး ရှင်းလင်းရေးလုပ်တယ်။ စခန်းကို အကုန်လုံး ဖျက်ဆီးလိုက်တယ်။ အခုလောလောဆယ်တော့ ရှင်းလင်းရေးလုပ်နေတယ်။”
ထယ်ဘွေးစခန်းဟာ မတူပီအခြေစိုက် ခလရ ၃၀၄ လက်အောက်ခံ တပ်စခန်းဖြစ်ပြီး စစ်ကောင်စီတပ်သား အင်အား ၄၀ လောက် အထိုင်ချထားတာ ဖြစ်ပါတယ်။
ထယ်ဘွေးစခန်းသိမ်းတိုက်ပွဲကို CDF-မတူပီ၊ CNO/CNDF၊ CDF-မင်းတပ်၊ CDF-လောက်တူတို့ ပါဝင်တိုက်ခိုက်ခဲ့ကြပြီး CDF-မင်းတပ်မှ ရဲဘော် ဆလိုင်းပီတာလိန်း ကျဆုံးခဲ့ပါတယ်။
