ပါကစ္စတန်နိုင်ငံမှာ လာမယ့်နှစ်အစောပိုင်း ကျင်းပမယ့် အမျိုးသားရွေးကောက်ပွဲမတိုင်ခင် လုံခြုံရေးစိုးရိမ်မှုတွေ မြင့်တက်နေပြီး ဒီဇင်ဘာ ၁၅ ရက် အနောက်မြောက်ပိုင်း နယ်စပ်အနီး တန့်ခ်ခရိုင်မှာ သေနတ်ပစ်ခတ်မှု ဖြစ်ပွားခဲ့ရာ ရဲအရာရှိ ၃ ဦးနဲ့ စစ်သွေးကြွ ၃ ဦး သေဆုံးသွားတယ်လို့ ပါကစ္စတန်ရဲတပ်ဖွဲ့က ပြောပါတယ်။
အာဖဂန်နစ္စတန်နဲ့ ထိစပ်နေတဲ့ ပါကစ္စတန်နိုင်ငံရဲ့ တရားဥပဒေမစိုးမိုးတဲ့ လူမျိုးစုခရိုင်တွေအနီး ဒီရာ အစ္စမေးလ် ခန်း ခရိုင်မှာ ပါကစ္စတန်စစ်သား ၂၃ ဦး သေဆုံးခဲ့တဲ့ ဒေသတွင်း စစ်သွေးကြွတိုက်ခိုက်မှုအပြီး ၂ ရက်အကြာမှာ ဖြစ်ပွားခဲ့တာပါ။
ဒီဇင်ဘာ ၁၅ ရက်နေ့ တိုက်ခိုက်မှုကတော့ စစ်သွေးကြွတဦးဟာ ရဲတပ်ဖွဲ့ ရုံးခန်းရဲ့ အဓိက ဝင်ပေါက်နေရာမှာ သူ့ကိုယ်သူ ဖောက်ခွဲခဲ့တာဖြစ်ပါတယ်။ လူနေအိမ်ရာကိုလည်း ပိတ်ဆို့ထားလိုက်ပြီး တခြားသူတွေက ဝင်ရောက်စီးနင်း တိုက်ခိုက်ခဲ့ပါတယ်။
အန်ဆာ-အူလ်-အစ္စလာမ် လို့ သူတို့ဖာသာ အသိအမှတ်ပြုထားတဲ့ လူသိနည်း စစ်သွေးကြွအဖွဲ့တဖွဲ့ရဲ့ ပထမဆုံး တိုက်ခိုက်မှုဖြစ်တယ်လို့ ရိုက်တာသတင်းမှာ ဖော်ပြထားပါတယ်။
ဒီအဖွဲ့သစ်ဟာ အစ္စလာမ္မစ်နဲ့ ဂိုဏ်းဂဏပေါင်းများစွာ ရှိနေတဲ့ အဓိက ပင်မအဖွဲ့ တယ်ရိခ်-အီ-တာလီဘန် ပါကစ္စတန် (TTP) အဖွဲ့ရဲ့ အစိတ်အပိုင်းတခု ဟုတ် မဟုတ် ရှင်းရှင်းလင်းလင်း မသိရသေးပါဘူး။
TTP အဖွဲ့ဟာ အစိုးရကို ဖြုတ်ချပြီးတော့ တင်းကျပ်တဲ့ အစ္စလာမ် အုပ်ချုပ်ရေးနဲ့ အစားထိုးဖို့အတွက် နိုင်ငံမှာ နှစ်ပေါင်းများစွာ တိုက်ပွဲတွေ ဆင်နွှဲနေခဲ့တာ ဖြစ်ပါတယ်။
Source/Photo - Reuters
