မွန်ပြည်နယ်၊ သထုံမြို့နယ်နဲ့ ဘီးလင်းမြို့နယ်ထဲကို စစ်ကောင်စီတပ်ရဲ့ လက်နက်ကြီး ပစ်ခတ်မှုကြောင့် အရပ်သား တယောက် သေဆုံးပြီး နေအိမ် ၁၀ လုံးထိခိုက်ပျက်စီးခဲ့တယ်လို့ ဒေသခံတွေနဲ့ KNU သထုံခရိုင်ရဲ့ ထုတ်ပြန်ချက်အရ သိရပါတယ်။
ပြီးခဲ့တဲ့ ဒီဇင်ဘာ ၇ ရက်နေ့မှာ ဘီးလင်းမြို့နယ်အခြေစိုက် စစ်ကောင်စီရဲ့ အမှတ်(၃၁၄) အမြောက်တပ်ကနေ ဘီးလင်းနဲ့ သထုံမြို့နယ်အတွင်းရှိ ကျေးရွာတွေထဲကို လက်နက်ကြီး ၂၃ လုံးထက်မနည်း ပစ်ခတ်ခဲ့ပါတယ်။
လက်နက်ကြီးကျည် ၃ လုံးဟာ သထုံမြို့နယ် ပန်းအောင်ကုန်းကျေးရွာထဲကို ကျရောက် ပေါက်ကွဲခဲ့တဲ့အတွက် ဆိုင်ကယ်စီးနင်းလာတဲ့ အဝန်းကြီးကျေးရွာသား အသက် ၄၆ အရွယ် စောလာအော ထိမှန်သေဆုံးခဲ့တာပါ။
ပန်းအောင်ကုန်းဒေသခံ တစ်ဦးက“ဒီမှာက နေ့စဉ်နဲ့အမျှ စစ်တပ်က လက်နက်ကြီး ပစ်နေတာ၊ ဟိုနေ့ကတော့(ဒီဇင်ဘာ ၇ ရက်) အဝန်းကြီးရွာသား တစ်ယောက် ဆုံးသွားတယ်၊ ရွာမှာက လူသိပ်မရှိတော့ဘူး၊ အများစုက ပြေးနေကြပြီ”လို့ပြောပါတယ်။
အဲဒီနေ့မှာပဲ စစ်ကောင်စီ အခြေစိုက်တပ်ရင်းတွေကနေ လက်နက်ကြီး ပစ်ခတ်မှုကြောင့် ဘီးလင်းမြို့နယ် ရွှေရောင်ပြကျေးရွာရှိ နော်မငယ်၊ နော်တေး၊ နော်မီးမီး၊ တီးတာဃဲ၊ တီးမောင်နုနဲ့ တီးကီးတို့ နေအိမ်တွေ ထိခိုက်ပျက်စီးခဲ့သလို နွား ၃ ကောင်လည်း ထိမှန်ဒဏ်ရာရရှိခဲ့တယ်လို့ KNU သထုံခရိုင်ရဲ့ ထုတ်ပြန်ချက်မှာ ဖော်ပြပါတယ်။
ပြီးခဲ့တဲ့ ဒီဇင်ဘာ ၄ ရက်ကလည်း ဘီးလင်းမြို့နယ် ဒေါက်ရပ်ကျေးရွာထဲ စစ်ကောင်စီတပ်ရဲ့ လက်နက်ကြီး ပစ်ခတ်မှုကြောင့် မဌေးဝင်း၊ ဒေါ်လင်းရွှေ၊ ဒေါ်မကြူနဲ့ ဦးတုတ်ပေတို့ နေအိမ်တွေ ထိခိုက်ပျက်စီးခဲ့ပါတယ်။
စစ်ကောင်စီတပ်ရဲ့ လက်နက်ကြီး ပစ်ခတ်မှုကြောင့် ရွှေရောင်ပြ၊ အဝန်းကြီး၊ ပန်းအောင်ကုန်း အပါအဝင် အနီးပတ်ဝန်းကျင် ကျေးရွာ ၅ ရွာထက်မနည်း ထွက်ပြေး တိမ်းရှောင်နေရတယ်လို့ ဒေသခံတွေထံက သိရပါတယ်။
KNU သထုံခရိုင်ရဲ့ ထုတ်ပြန်ချက်တွေအရ အာဏာသိမ်းကာလအတွင်း စစ်ကောင်စီတပ်ရဲ့ လက်နက်ကြီး ပစ်ခတ်မှုကြောင့် ဒေသခံပြည်သူလူထု နှစ်သိန်းနီးပါး ထွက်ပြေးတိမ်းရှောင်နေရပြီး လူသားချင်းစာနာမှု အကူအညီတွေ လိုအပ်နေတယ်လို့ ထုတ်ပြန်ထားပါတယ်။
