ရှမ်းပြည်နယ် မြောက်ပိုင်း၊ မူဆယ်ခရိုင်အတွင်းရှိ နမ့်ခမ်းနဲ့ ၁၀၅ မိုင်မှာ စစ်ကောင်စီက ဒီဇင်ဘာ ၁၁ ရက်နဲ့ ၁၂ ရက်နေ့တွေမှာ လေကြောင်းကနေ ဗုံးကြဲတာကြောင့် နေအိမ် အများအပြား ထိခိုက်ပျက်စီးခဲ့ပြီး သေဆုံး ဒဏ်ရာရသူတွေ ရှိတယ်လို့ ဒေသခံတွေက ပြောပါတယ်။
ဒေသခံ အမျိုးသမီး ၁ ဦးက “လေယာဉ်ဗုံးက တလုံးပဲ ကျပေမယ့်၊ ဘေးနားက အိမ်တွေ အများကြီး ထိသွားတယ်” လို့ ပြောပါတယ်။
နမ့်ခမ်းမြို့ ကောင်းဆာရွာက နေအိမ်ပေါ် လေယာဉ်ဗုံး ထိမှန်တာကြောင့် အသက် ၆၀ ဝန်းကျင်ရှိ ဒေါ်လုံးလှအောင် ဗုံးစထိမှန် သေဆုံးသွားတယ်လို့ ဆိုပါတယ်။
နမ့်ခမ်းဒေသခံ အမျိုးသားတဦးက “နမ့်ခမ်းမှာ လေယာဉ် ၆ စီးနဲ့ လာပစ်နေတာ ဒီနေ့တော့။ ကြည့်ရတာ အခြေအနေ သိပ်မကောင်းဘူး။ ပလောင်တွေ စစ်ကောင်စီတွေရဲ့ ဘန်ကာ ကတုတ်နားအထိ ထိုးစစ်ရောက်လာလို့ လေယာဉ်ခေါ်နေတယ်။ ကျနော့်အထင် ဒီနေ့ စစ်ကောင်စီတပ်စခန်း လွှတ်ချနိုင်ခြေ ရှိနေတယ်” လို့ ပြောပါတယ်။
မနေ့ည ၆ နာရီ ဝန်းကျင်မှာလည်း မူဆယ်နဲ့ နမ့်ခမ်းကြားက စယ်လန့်ရွာဘက် လေယာဉ်နဲ့ ၂ ကြိမ်၊ ၃ ကြိမ်လောက် ဗုံးလာကြဲသွားတယ်လို့ ဆိုပါတယ်။
စစ်ကောင်စီဘက်က ရဟတ်ယာဉ် ၃ စီးနဲ့လည်း အင်အားရာချီ လာဖြည့်သွားတာ တွေ့ရတယ်လို့ ဒေသခံတွေက ပြောပါတယ်။
ဒီဇင်ဘာ ၁၁ ရက်နေ့ညကလည်း နမ့်ခမ်းမြို့ ရဲစခန်းအနောက်ဘက် ရပ်ကွက်မှာ လေယာဉ်ဗုံး ၂ လုံး၊ ကော်ဆွဲ့ဟွမ်ခန်းမဘက် ဗုံး ၁ လုံးကျပြီး နေအိမ်တွေ ပျက်စီးသွားတယ်လို့ ဆိုပါတယ်။
ဒါ့အပြင် မူဆယ် ၁၀၅ မိုင်မှာလည်း ဒီဇင်ဘာ ၁၁ ရက်နေ့ ညနေမှာ စစ်ကောင်စီက ရဟတ်ယာဉ်ရော ဂျက်ဖိုက်တာနဲ့ပါ ဗုံးကြဲတိုက်ခိုက်ခဲ့တာကြောင့် ပြည်သူ ၁ ဦး သေဆုံးကာ နေအိမ်၊ အဆောက်အဦတွေ ပျက်စီးခဲ့ပါတယ်။
PSLF/TNLA သတင်းနဲ့ ပြန်ကြားရေးဌာနကတော့ ဒီဇင်ဘာ ၁၁ ရက်နေ့ညမှာ စစ်ကောင်စီက ဂျက်လေယာဉ်နဲ့ ပေါင် ၅၀၀ ဗုံး ကြဲတိုက်ခိုက်တာကြောင့် နမ့်ခမ်းပေါက်နေ ရပ်ကွက်ထဲ ထိမှန်ကျကွဲကာ ပြည်သူ ၃ ဦး ဒဏ်ရာရပြီး နေအိမ် ၁၀ လုံးကျော် ထိခိုက် ပျက်စီးသွားတဲ့အပြင် လက်နက်ကြီး ထိမှန်လို့ မူဆယ် ၁၀၅ မိုင်က ဒေသခံ ၁ ဦး ထိမှန်သေဆုံးပြီး ၅ ဦး ဒဏ်ရာရကြောင်း သတင်းထုတ်ထားပါတယ်။
၁ လကျော် ကြာပြီဖြစ်တဲ့ နမ့်ခမ်းမြို့အနီးက စခန်းသစ်တိုက်ပွဲအတွင်း စစ်ကောင်စီဘက်က Jet Fighter နဲ့ ၂၂၁ ကြိမ်၊ Y8/Y12 လေယာဉ်နဲ့ ၆၂ ကြိမ်၊ Mi 35 နဲ့ ၁၇ ကြိမ်၊ မန်တပ်နဲ့ နမ့်ဖတ်ကာ စစ်ကောင်စီစခန်းတို့မှ လက်နက်ကြီး အကြိမ် ၃၅၀ ထက်မနည်း တိုက်ခိုက်ခဲ့တယ်လို့ ဆိုပါတယ်။
