ချင်းပြည်နယ်၊ ပလက်ဝမြို့နယ်မှာ ဒီဇင်ဘာ ၈ ရက် မနက်ပိုင်းက စစ်ကောင်စီတပ် လက်နက်ကြီးနဲ့ ပစ်ခတ်လို့ ဆေးရုံဝန်ထမ်းအိမ်ရာက ကလေးငယ်တယောက် ဒဏ်ရာရရှိခဲ့တယ်လို့ ဒေသခံတွေဆီကနေ သိရပါတယ်။
ပလက်ဝမြို့နယ် အခြေစိုက် ခလရ ၂၈၉ တပ်ရင်းက ဒီဇင်ဘာ ၈ ရက် မနက် ၁၀ နာရီ ၄၈ မိနစ်လောက်မှာ လက်နက်ကြီးတွေနဲ့ ပစ်ခတ်ခဲ့လို့ ဆေးရုံဝန်ထမ်းအိမ်ရာမှာ ကျရောက်ပေါက်ကွဲခဲ့ပြီး ဝန်ထမ်းအဆောင်ရဲ့ခေါင်မိုး ပွင့်ထွက်သွားတယ်လို့ ဒေသခံတယောက်က ဒီဗွီဘီကို ပြောပါတယ်။
အဲဒီလက်နက်ကြီးကျည် ကျရောက်ပေါက်ကွဲမှုကြောင့် ပလက်ဝ ပြည်သူ့ဆေးရုံဝန်ထမ်း တယောက်ရဲ့ အသက် ၆ နှစ်အရွယ် သမီးလေးတယောက်ကို လက်နက်ကြီးကျည်စ ထိမှန်ပြီး ခြေထောက်မှာ ဒဏ်ရာရရှိခဲ့တယ်လို့ ဆိုပါတယ်။
အဲဒီကလေးငယ်ကိုတော့ ပလက်ဝပြည်သူ့ဆေးရုံမှာ ဆေးဝါးကုသတာတွေ ပြုလုပ်ပေးထားကြတယ်လို့ ပြောပါတယ်။
ပလက်ဝမြို့နယ်မှာ ဒီဇင်ဘာ ၄ ရက် ညနေ ၄ နာရီလောက်ကလည်း စစ်ကောင်စီဘက်က Mi35 တိုက်ခိုက်ရေးရဟတ်ယာဥ်နဲ့ ကျေးရွာတွေကို ရမ်းကားပစ်ခတ်ခဲ့လို့ ပြည်သူတယောက် ဒဏ်ရာရရှိခဲ့တယ်လို့ ဒေသခံတွေဆီကနေ သိရပါတယ်။
