ရှမ်းပြည်နယ်မြောက်ပိုင်း နမ့်ခမ်းမြို့မှာ စစ်ကောင်စီက ဒီနေ့ လေကြောင်းကနေ ဗုံးကြဲတာကြောင့် အသက် ၅ နှစ်အရွယ် ကလေး ၁ ယောက်အပါအဝင် မိသားစုဝင် ၅ ယောက် သေဆုံးခဲ့ပြီး ၄ ယောက် ဒဏ်ရာရသွားပါတယ်။
ဗုံးတလုံးဟာ ဟိုနားကျေးရွာက နေအိမ်တလုံးပေါ် ကျရောက်ပေါက်ကွဲခဲ့ပြီး အသက် ၅ နှစ်အရွယ် ကလေးငယ် ၁ ယောက် အပါအဝင် မိသားစုဝင် ၅ ယောက်လုံး သေဆုံးခဲ့တယ်လို့ ဆိုပါတယ်။
သေဆုံးသွားသူတွေကတော့ အသက် ၅ နှစ်အရွယ် လွေးအို၊ ၃၅ နှစ်အရွယ် မိုင်းယိုင်လေး၊ ၄၆ နှစ်အရွယ် တာဆွေ၊ အသက် ၅၀ အရွယ် မာခမ်းလီးနဲ့ ၅၆ နှစ်အရွယ် ယားဘာတို့ ဖြစ်ကြပြီး အသက် ၆ နှစ်အရွယ် ကလေးငယ်တယောက်အပါအဝင် ၄ ယောက် ဒဏ်ရရတယ်လို့ ဆိုပါတယ်။
အဲဒီထဲက ၂ ယောက်ဟာ ဒဏ်ရာပြင်းထန်ပြီး ည ၁၂ နာရီအချိန်ကလည်း ပန်လော်ကျေးရွာကို ဗုံးကြဲခဲ့လို့ အိမ် ၇ လုံး ပျက်စီးသွားတယ်လို့ ဆိုပါတယ်။
ဒီဇင်ဘာ ၆ ရက် မနေ့မနက်ကလည်း ကျောက်မဲမြို့နယ်က စစ်ကောင်စီတပ် ၅၀၁၊ ၅၀၂ ကနေ လက်နက်ကြီးနဲ့ ပစ်ခတ်ပြီး ကျောက်မဲမြို့၊ အောင်မြေသာယာရပ်ကွက်(ငြိမ်းချမ်းရေးကုန်း)မှာ ကျရောက်ပေါက်ကွဲခဲ့လို့ အရပ်သားနေအိမ် ၂ လုံး ထိခိုက်ပျက်စီးခဲ့ပါသေးတယ်။
၁၀၂၇ စစ်ဆင်ရေးအတွင်း စစ်ကောင်စီက အရပ်သားပြည်သူလူထုကို ဦးတည်ပြီး လက်နက်ကြီးနဲ့ လေကြောင်းအသုံးပြု တိုက်ခိုက်တာတွေကြောင့် ကလေးငယ် ၁၄ ယောက် အပါအဝင် ဒေသခံ ၆၀ ကျော် သေဆုံးခဲ့ပြီး ၁၃၇ ယောက် ထိခိုက်ဒဏ်ရာရရှိခ့တယ်လို့ TNLA က ထုတ်ပြန်ထားပါတယ်။
ဒီနေ့ စစ်ရေးသတင်းတွေကတော့ တပ်မဟာ(၂)စစ်ဒေသ၊ မိုင်းလုံမြို့နယ်က စစ်ကောင်စီရဲ့ လယ်ကြီးတပ်စခန်းကို နေ့လယ်ပိုင်းမှာ တအာင်းတပ်မတော် PSLF/TNLA နဲ့ မိုးကုတ်ဗျူဟာ PDF ပူးပေါင်းတပ်ဖွဲ့တို့က တိုက်ခိုက်သိမ်းပိုက်နိုင်ခဲ့ပြီး ၆၀/၈၀ မမ လက်နက်ကြီးအပါအဝင် လက်နက် ၁၀ လက်နဲ့ စစ်အသုံးအဆောင်ပစ္စည်းတွေ ရခဲ့တယ်လို့ ဆိုပါတယ်။
တပ်မဟာ(၃)စစ်ဒေသ၊ မန်တုံမြို့နယ်က စစ်ကောင်စီရဲ့ ခိုမုန်းတပ်စခန်းကို ညနေပိုင်းမှာ ဝင်ရောက်ရှင်းလင်း သိမ်းပိုက်နိုင်ခဲ့ပြီး မနက်ပိုင်းကလည်း တပ်မဟာ(၁)စစ်ဒေသ၊ နမ့်ခမ်းမြို့နယ်က စစ်ကောင်စီရဲ့ စခန်းသစ်ကုန်းကို တိုက်ခိုက်ခဲ့တယ်လို့ ဆိုပါတယ်။
