စစ်ကိုင်းတိုင်း၊ ကောလင်းမြို့နယ် ပြည်သူ့အုပ်ချုပ်ရေးအဖွဲ့က Non-CDM ဝန်ထမ်းတွေအနေနဲ့ အလင်းဝင်ဖို့ အမိန့်ကြေညာစာထုတ်ပြန်ပြီးနောက်မှာ ပညာရေးဝန်ထမ်းတွေအပါအဝင် Non-CDM ဝန်ထမ်းအယောက် ၁၀၀ နီးပါး အလင်းဝင်ရောက်လာခဲ့တယ်လို့ အမျိုးသားညီညွတ်ရေးအစိုးရ (NUG) က ထုတ်ပြန်ပါတယ်။
ခရိုင်အဆင့်ရှိတဲ့ ကောလင်းမြို့ကို နိုဝင်ဘာ ၆ ရက်မှာ အမှတ် (၁) စစ်ဒေသ၊ ကောလင်း ခရိုင်ကွပ်ကဲမှု အစီအစဉ်နဲ့ ကချင်လွတ်လပ်ရေးတပ်မတော် (KIA)၊ ပြည် သူ့ကာကွယ်ရေးတပ်မတော် (PDF)၊ ပြည်သူ့ကာကွယ်ရေးအဖွဲ့ (ပကဖ) နဲ့ တော်လှန် ရေးအဖွဲ့တွေကတိုက်ခိုက်သိမ်းပိုက်ခဲ့တာပါ။
၄ ရက်ကြာတိုက်ပွဲမှာ ကောလင်းရဲစခန်း၊ ထွေအုပ်ရုံး၊ မြေစာရင်းရုံး၊ မြန်မာ့စီးပွားရေးဘဏ်တို့မှာ အခြေချထားတဲ့ စစ်ကောင်စီတပ်သားတွေကို အဆင့်ဆင့် တိုက်ခိုက်သိမ်းယူခဲ့ရတာဖြစ်ပါတယ်။
နိုဝင်ဘာ ၈ ရက်မှာတော့ ကောလင်းခရိုင်အရေးပေါ် အုပ်ချုပ်ရေးဆိုင်ရာ ခရိုင်ပေါင်းစပ် ညှိနှိုင်းရေးအဖွဲ့ကို NUG အစိုးရ၊ ကြားကာလဒေသန္တရ အုပ်ချုပ်ရေး ဗဟိုကော်မတီ ဥက္ကဋ္ဌ၊ ပြည်ထောင်စုဝန်ကြီးချုပ် မန်းဝင်းခိုင်သန်းက ဖွဲ့စည်း တာဝန်ပေးအပ်ထားပါတယ်။
လတ်တလော အလင်းဝင်ရောက်လာခဲ့တဲ့ အကြမ်းဖက် စစ်ကောင်စီ လက်အောက်ခံ Non-CDMဝန်ထမ်းတွေထဲမှာတော့ ပညာရေးဝန်ထမ်း ၃၃ ယောက်အပါအဝင် ထွေအုပ်၊ စည်ပင်၊ လျှပ်စစ်၊ အခွန်၊ သစ်တော၊ သစ်ထုတ်လုပ်ရေး၊ သစ်လုပ်ငန်း၊ မီးသတ်၊ စိုက်ပျိုးရေး၊ မြန်မာ့စီးပွားရေးဘဏ်၊ မီးရထား၊ မီးရထားရဲ၊ ဆက်သွယ်ရေး၊ အား/ကာ၊ မြေစာရင်း၊လူဝင်မှုကြီးကြပ်ရေး၊ ကျေးလက်ဒေသဖွံ့ဖြိုးတိုးတက်ရေးစတဲ့ ဌာနဆိုင်ရာ အသီးသီးက ပါဝင်ပြီး သူတို့ကိုတော့ အမျိုးသားညီညွတ်ရေးအတိုင်ပင်ခံကောင်စီက ထုတ်ပြန်ထားတဲ့ နိုင်ငံ့ဝန်ထမ်း CDM မူဝါဒနဲ့အညီ ဆက်လက်ဆောင်ရွက်သွားမှာဖြစ်ပြီး လူ့အခွင့်အရေးတွေနဲ့အညီ ဆောင်ရွက်နေတယ်လို့ ထုတ်ပြန်ထားပါတယ်။
စစ်ကိုင်းတိုင်းအတွင်းက Non-CDM ဝန်ထမ်းတွေ အလင်းဝင်ရောက်ကြဖို့ NUG အစိုးရ၊ ပြည်ထဲရေးနှင့်လူဝင်မှုကြီးကြပ်ရေးဝန်ကြီးဌာနက နိုဝင်ဘာ ၁၆ ရက်က တည်းက အမိန့်ကြေညာချက်ကို ထုတ်ပြန်ထားပြီးဖြစ်လို့ Non-CDM ဝန်ထမ်းတွေ အနေနဲ့ နောက်ဆုံး အခွင့်အရေးအနေနဲ့ ပြည်သူလူထုဘက်က ရပ်တည်ကြဖို့နဲ့ လိုက်နာဆောင်ရွက်ခြင်းမရှိပါက ဥပဒေအရ ပြင်းထန်စွာ အရေးယူဆောင်ရွက်တာကို မလွဲမသွေ ခံယူရမယ်လို့ ဆိုပါတယ်။
