လားရှိုးနဲ့ မူဆယ်မြို့နယ်မှာ စစ်ကောင်စီတပ်က လေကြောင်းကနေ ဗုံးကြဲတိုက်ခိုက်တာကြောင့် ၄ လသားအရွယ် ကလေးအပါအဝင် ၃ ယောက် သေဆုံးသွားတယ်လို့ တအာင်းတပ်မတော် (TNLA) က ထုတ်ပြန်ပါတယ်။
ည ၁၀ နာရီကျော်မှာလည်း မူဆယ်မြို့နယ် ၁၀၅ မိုင်ကို ဂျက်လေယာဉ်နဲ့ ထပ်ပြီး ဗုံးကြဲတာကြောင့် နေအိမ်အများအပြား ထိခိုက်ပျက်စီးခဲ့သလို ဖုန်းလိုင်းနဲ့ အင်တာနက်လိုင်းတွေကိုလည်း ဖြတ်တောက်ပစ်ခဲ့တယ်လို့ ဆိုပါတယ်။
ည ၁၁ လောက်မှာတော့ မူဆယ်မြို့နယ်၊ နမ့်ခွမ်ကျေးရွာကို ဂျက်လေယာဉ်နဲ့ ဗုံး ၃ လုံး ကြဲချတိုက်ခိုက်တာကြောင့် အဘွားနဲ့အတူ အိပ်ပျော်နေတဲ့ ၄ လသားအရွယ် ကလေးငယ် တယောက် ဦးခေါင်းထိမှန်သေဆုံးခဲ့ပြီး အဘွားဖြစ်သူမှာလည်း လက်မှာကျည်စထိမှန် ဒဏ်ရာရခဲ့တယ်လို့ ထုတ်ပြန်ဖော်ပြထားပါတယ်။
အဲဒီမှာ အရပ်သား ၃ ယောက် ဒဏ်ရာရသလို နေအိမ် ၁၀ လုံးလောက်လည်း ပျက်စီးခဲ့ပြီး စစ်ကောင်စီတပ်ဟာ တိုက်ပွဲမဖြစ်တဲ့ အရပ်သားတွေနေတဲ့ ကျေးရွာတွေကို လက်နက်ကြီးနဲ့ လေကြောင်းအသုံးပြု ဗုံးကြဲတိုက်ခိုက်တာကို ပိုလုပ်လာနေတယ်လို့ ဆိုပါတယ်။
ဒီဇင်ဘာ ၂ ရက်နေ့ ည ၉ နာရီကျော်က လားရှိုးမြို့နယ်၊ ပန်သပြေအုပ်စု၊ လုံတွေကျေးရွာကို ပေါင် ၅၀၀ ဗုံး ၄ လုံး လာရောက်ကြဲချတိုက်ခိုက်ခဲ့တာကြောင့် ဒေသခံ အမျိုးသမီး ၂ ယောက် အခင်းဖြစ်နေရာမှာ သေဆုံးပြီး ၁ ယောက် ထိခိုက်ဒဏ်ရာရသလို အိမ် ၉ လုံးလောက် ဗုံးစမှန် ပျက်စီးခဲ့တယ်လို့လည်း ဆိုပါတယ်။
စစ်ကောင်စီတပ်ဟာ နမ့်ခမ်းမြို့ကိုလည်း ဂျက်တိုက်လေယာဉ်နဲ့ ၁၁ ကြိမ်လောက် လာရောက်တိုက်ခိုက်ပြီး ကင်းထောက်လေယာဉ်နဲ့ ဗုံး ၂၄ လုံး ကြဲချခဲ့တယ်လို့လည်း ထုတ်ပြန်ထားပါတယ်။
