ကရင်နီ(ကယား)ပြည်နယ်၊ လွိုင်ကော်မြို့မှာ ကရင်နီပူးပေါင်းတပ်တွေ ၁၁၁၁ တော်လှန်ရေး စတင်တဲ့နောက်မှာ လူထုတွေကို ကူညီကယ်ဆယ်ပေးနေတဲ့ ပရဟိတအသင်းတချို့ရဲ့ ကားတွေ သိမ်းဆည်းခံလိုက်ရပါတယ်။

လွိုင်ကော်မြို့တွင်းမှာလည်း နေအိမ်အပြင်ထွက်ခွင့် ပိတ်ထားပြီး အထူးသဖြင့် ပရဟိတအသင်း ကားတွေကို ပိတ်တာဖြစ်တယ်လို့ ပရဟိတအသင်းတခုက ဆိုပါတယ်။

ပရဟိတအသင်းဝင်တဦးက “ရှေ့ရက်ကတည်းက ကျနော်တို့ Ambulance ကားတွေ လှုပ်ရှားခွင့် ပိတ်ထားတယ်ဗျ၊ မကူညီနိုင်ဘူး။ အဓိကအားဖြင့် ပရဟိတကားတွေ ပိတ်တာ၊ မြို့တွင်းကပဲ။ ၂ စီးကတော့ ထိန်းသိမ်းခံရတယ်။ လူတော့ ခေါ်မေးတာ မရှိသေးဘူး” လို့ ပြောပါတယ်။

တိုက်ပွဲတွေဖြစ်ပွားနေတဲ့ နာနတ်တော်ရပ်ကွက်အတွင်းမှာ နေထိုင်တဲ့ မိဘပြည်သူတွေကို ကူညီပို့ဆောင်ပေးခဲ့ပြီး ထပ်မံကူညီဖို့ပေမဲ့ လမ်းတဝက်မှာ ကားနှစ်စီးလုံး အသိမ်းခံခဲ့ရတယ်လို့ ကားသိမ်းဆည်းခံခဲ့ရတဲ့ ပရဟိတအသင်းက ဆိုပါတယ်။

ကရင်နီ(ကယား)ပြည်နယ် လွိုင်ကော်မြို့မှာ နိုဝင်ဘာ ၁၁ ရက်ကစပြီး ကရင်နီပူးပေါင်းတပ်တွေက စစ်ဆင်ရေးစတင်ကာ စစ်ကောင်စီတပ်တွေနဲ့ တိုက်ပွဲပြင်းထန်နေတာ ၃ ရက်ရှိလာပြီ ဖြစ်ပါတယ်။

ဒီကနေ့မနက် ၆ နာရီဝန်းကျင်မှာလည်း လွိုင်ကော်မြို့၊ ထေးငှားလျားကန်၊ နာနတ်တော်၊ နွားလဝိုးနဲ့ နောင်ယား ရပ်ကွက်တွေမှာ တိုက်ပွဲတွေ ဆက်လက်ဖြစ်ပွားနေပါတယ်။

တိုက်ပွဲတွေကြောင့် ပိတ်မိနေတဲ့ ပြည်သူတွေလည်း အများအပြားရှိနေပြီး အကူအညီတွေလည်း လိုအပ်နေတယ်လို့ ပရဟိတအသင်းတွေက ပြောဆိုကြပါတယ်။