အမေရိကန်နိုင်ငံ၊ နယူးယောက်မြို့၊ Madison Square Gardenမှာ ကျင်းပခဲ့တဲ့ UFC 295 ပွဲစဉ်မှာ ချင်းတိုင်းရင်းသားဖိုက်တာ ဂျော့ရှူဝါဗန်က ပြိုင်ဘက် ပီရူးနိုင်ငံသား ဖိုက်တာကို ဒိုင်အဆုံးအဖြတ်အမှတ်နဲ့ အနိုင်ရရှိသွားတယ်။
အဆိုပါပွဲစဉ်တွေဟာ စုစုပေါင်း တွဲဆိုင်း ၁၂ ဆိုင်းအထိ ပါဝင်ခဲ့ပြီး မြန်မာစံတော်ချိန် နိုဝင်ဘာ ၁၂ ရက်၊ မနက် ၅ နာရီခွဲလောက်မှာ ဂျော့ရှူဝါဗန်နဲ့ ပီရူးနိုင်ငံသားဖိုက်တာ ကယ်ဗင်ဘောချက် Kenvin Borjas တို့က ဖလိုက်ဝိတ်အစောပိုင်းပွဲဆိုင်း ဒုတိယပွဲအဖြစ် ထိုးသတ်ခဲ့ကြပါတယ်။
ပွဲချိန်ဟာ ၅ မိနစ် ၃ ချီပွဲ ဖြစ်ပြီး ပထမအချီ ၁ မိနစ်ခွဲလောက်မှာ ကယ်ဗင်ရဲ့ ခြေကန်ချက်၊ ညာဝိုက်လက်သီးတွေကြောင့် ဂျော့ရှူဝါဗန် လဲကျသွားခဲ့ပေမဲ့ ချက်ချင်းပြန်ထနိုင်ကာ Body Shot ထိုးနည်းကို အသုံးပြုပြီး ပထမပွဲချိန် ပြီးသွားခဲ့ပါတယ်။
ဒုတိယပွဲချီတွေမှာလည်း ဂျော့ရှူဝါဟာ ပြိုင်ဖက်ကို Body Shot တွေအပြင် မြေပြင်လှဲချမှုတွေ ရှိခဲ့ပြီး တတိယပွဲချီမှာ မြေပြင်လှဲချမှု ၂ ကြိမ်၊ ညာထောက်လက်သီးအသုံးပြုမှုတွေနဲ့ ပြိုင်ဖက်ပီရူးနိုင်ငံသား ကို ဖိအားပေး ကစားနိုင်ခဲ့ပါတယ်။
ပွဲပြီးဆုံးချိန်မှာ ဒိုင်တွေအဆုံးအဖြတ် ၃ ချီအသာစီးရမှတ်နဲ့ ဂျော့ရှူဝါဗန် အနိုင်ရသွားခဲ့ပြီး MMA ဖိုက်တာဘ၀မှာ ၁၀ ပွဲနိုင် ၁ ပွဲသရေ ရလဒ်နဲ့ ဖလိုက်ဝိတ်တန်းရဲ့ ကစားအဆင့် ၃၂ မှာ ရောက်ရှိသွားပြီ ဖြစ်ပါတယ်။
UFC 295 ပွဲစဉ်ဟာ ချင်းတိုင်းရင်းသား ဖိုက်တာ ဂျော့ရှူဝါဗန်ရဲ့ ဒုတိယမြောက်ပွဲဖြစ်ပြီး အခုပွဲစဉ်မှာ မြန်မာနိုင်ငံအလံကို ခြုံပြီး ကြိုးဝိုင်းထဲဝင်ဖို့ ခွင့်ပြုချက် ရရှိခြင်းမရှိတာကြောင့် နောက်ထိုးသတ်မယ့် ပွဲစဉ်တွေဟာ UFC ကြိုးဝိုင်းတွေထဲကို မြန်မာနိုင်ငံအလံခြုံပြီး ဝင်ရောက်ဖို့ မျှော်လင့်ပါတယ်လို့ သူရဲ့ Joshua “ The Fearless " Van လူမှုကွန်ရက်မှာ မျှဝေထားတာကို တွေ့ရပါတယ်။
