အာဆီယံနဲ့ ဆက်ဆံရေးမှာ ခွဲခြားဆက်ဆံမှုတွေကို တုံ့ပြန်သွားမှာဖြစ်ပြီး မြန်မာ့ကိုယ်ပိုင် နည်းလမ်း နဲ့သာ အာဆီယံနဲ့ ဆက်ဆံရေးတိုးတက်အောင်လုပ်မယ်လို့ စစ်အာဏာရှင်သမ္မတ မင်းအောင်လှိုင်က ပြောလိုက်ပါတယ်။
ဒီကနေ့ ဇူလိုင် ၃၁ ရက် စစ်အာဏာရှင်အစိုးရ သက်တမ်း ရက် ၁၀၀ ပြည့် စစ်အာဏာရှင်ဩဇာခံ ပြည်ထောင်စုလွှတ်တော်မှာပြောတဲ့ မိန့်ခွန်းမှာအခုလို ပြောဆိုလိုက်တာပါ။
ပြီးခဲ့တဲ့ ၅ နှစ်အတွင်းမှာ အာဆီယံနိုင်ငံတချို့က မြန်မာနိုင်ငံအပေါ်ခွဲခြားဆက်ဆံခဲ့ပေမဲ့ စိတ်ရှည် သည်းခံခဲ့ကြောင်း နောက်နောင်မှာတော့ အပြုသဘော မဆောင်တဲ့ ခွဲခြားဆက်ဆံမှုတွေ ရှိလာရင် ဖြစ်စဉ်အလိုက် တခုချင်းတုံ့ပြန်မယ်လို့ စစ်အာဏာရှင်သမ္မတ မင်းအောင်လှိုင်က ဆိုပါတယ်။
ဒါ့အပြင် နိုင်ငံတကာဆက်ဆံရေးမှာလည်း လွတ်လပ်ပြီး ဘက်မလိုက်တဲ့ နိုင်ငံခြားရေးမူဝါဒနဲ့ ငြိမ်းချမ်းစွာ အတူယှဉ်တွဲနေထိုင်ရေး မူကြီး ၅ ရပ်ကို စွဲကိုင်သွားမယ်လို့လည်းဆိုပါတယ်။
အာဆီယံရဲ့ ထုတ်ပြန်ချက်တွေနဲ့ပတ်သက်ပြီး စစ်အာဏာရှင်အစိုးရဲ့ ရှေ့လုပ်ငန်းစဉ်တွေကို အထောက်အကူပြုပြီး နိုင်ငံအတွက်က အကျိုးရှိမှသာ အပြုသဘောဆောင်ပြီး စဉ်းစားမယ်လို့ လည်း ထည့်သွင်းပြောဆိုသွားတယ်။
အာဏာသိမ်းပြီး ပြည်သူတွေကို နေ့စဉ်သတ်ဖြတ်နေတဲ့ မြန်မာစစ်အာဏာရှင် ခေါင်းဆောင်တွေကို အာဆီယံက ထိပ်သီးအစည်းအဝေးနဲ့ ဆက်စပ်အစည်းအဝေးတွေမှာ တက်ရောက်ခွင့်မပေးဘဲ ကြဉ်ဖယ်ထားတာ ဖြစ်ပါတယ်။
