ရှမ်းပြည်မြောက်ပိုင်း၊ လားရှိုးမြို့နယ်ထဲက မိုင်းတိမ်ရွာစစ်ရှောင်စခန်းကို စစ်တပ်က လက်နက်ကြီးနဲ့ပစ်လို့ ကလေးငယ်တယောက်အပါအဝင် ၂ ဦးသေဆုံးခဲ့တယ်လို့ ရှမ်းလူ့အခွင့်အရေးမဏ္ဍိုလ် (SHRF) မှ မယိန်းလျန်ဟန်က DVB ကို ပြောပါတယ်။
“ကျည် (၃) လုံး ဘုန်းကြီးကျောင်းထဲကျတယ်။ ၁ လုံးက မကွဲဘူး၊ ၂ လုံးကကွဲတယ်။ ကွဲတဲ့ ၂ လုံးမှာ အသက် ၆၀ ကျော် အဘွားတယောက်သေဆုံးတယ်။ အသက် ၁၀ နှစ်ဝန်းကျင် ကလေးတယောက်သေဆုံးတယ်။”
မိုင်းတိမ်ရွာ ဘုန်းကြီးကျောင်းမှာ ဖွင့်လှစ်ထားတဲ့ စစ်ရှောင်စခန်းမှာ လူဦးရေ ၅၀၀ ဝန်းကျင်ရှိပြီး အခြား အမျိုးသားတယောက်လည်း ခြေထောက် ပြတ်သွားတယ်လို့ မယိန်းလျန်ဟန်က ဆက်ပြောပါတယ်။
နိုဝင်ဘာ ၉ ရက်၊ မွန်းတည့် ၁၂ နာရီဝန်းကျင်အထိ လက်နက်ကြီးတွေ ဆက်လက်ပစ်ခတ်နေတာကြောင့် ဒေသခံတွေ ဘုန်းကြီးကျောင်းထဲ ပိတ်မိနေပြီး အသေးစိတ်ကို DVB အနေနဲ့ ထပ်ပြီးစုံစမ်းနေပါတယ်။
လားရှိုးတမြို့လုံးအနေနဲ့ကတော့ စစ်ရှောင် ၇၀၀၀ ကျော်ရှိပြီး စစ်ဆင်ရေးကာလအတွင်း လက်နက်ကြီးနဲ့ လေကြောင်းတိုက်ခိုက်မှုတွေကြောင့် ဒေသခံ ၇ ဦးဝန်းကျင် သေဆုံးထားတယ်လို့ လူမှုကူညီရေးအဖွဲ့တွေက ပြောပါတယ်။
မြောက်ပိုင်းမဟာမိတ်ညီနောင် (၃) ဖွဲ့ဘက်ကတော့ ပြင်ပအကူအညီဘာတခုမှမရှိသေးတဲ့အတွက် စစ်ဆင်ရေးဖော်ဆောင်ရင်း စစ်ရှောင်တွေနဲ့ ပိတ်မိနေသူတွေကိုပါ တက်နိုင်သလောက် အကန့်အသတ်နဲ့ ကူညီပေးနေတယ်လို့ DVB ကို ပြောဆိုထားပါတယ်။
စိုးသူအောင်
