ကရင်ပြည်နယ်၊ တောင်ငူ-လိပ်သိုကားလမ်းတလျှောက်က ဒေသခံတွေဟာ အသက်မွေးဝမ်းကြောင်းအနေနဲ့ စိုက်ပျိုးရေးကို အားထားလုပ်ကိုင်ပြီး ဖာလာကို ၈၀ ရာခိုင်နှုန်းအထိ အဓိကထား စိုက်ပျိုးကာ သံတောင်ဒေသအတွင်း ဖာလာစိုက်ဧက သောင်းနဲ့ချီရှိပြီး ဖာလာကို ဩဂုတ်လမှာ စတင်ဆွတ်ခူးကြပါတယ်။
ဒါ့အပြင် ဖလာဈေးနှုန်း ကျဆင်းနေချိန် စစ်ကောင်စီတပ်စခန်းတွေက ဖာလာတင်ယာဉ်တွေဆီကနေ ငွေတောင်းခံနေတယ်လို့ ဖာလာစိုက် တောင်သူတယောက်က ပြောပါတယ်။
“ဂိတ်မှာ ငွေကြေးကောက်ခံတာတွေ မလုပ်ရဘူးလို့ ရေးထားတယ်။ ဒါပေမဲ့ လက်တဖက်က ပေးလိုက်ရတာပဲလေ၊ သောင်းဂဏန်းမကဘူး၊ သိန်းဂဏန်းတော့ ပေးရမှာပဲ။ တောင်းတယ်ဆို ပေးရတာပဲ၊ မပေးဘူးဆို ပြဿနာမရှိ ပြဿနာရှာတယ်။”
စစ်ကောင်စီတပ်တွေက ယာဉ်မောင်းတွေဆီကနေ ငွေကြေးတောင်းယူတာတွေကြောင့် အရင်က ကုန်တင်ခအနေနဲ့ ဖာလာ ၁ ပိဿာ ၅၀၀ ရှိခဲ့ရာက အခု ၁ ပိဿာ ကျပ် ၁,၀၀၀ ပေးနေရပါတယ်။ တောင်သူတွေဟာ စစ်ကောင်စီတပ်တွေရဲ့ စစ်ဆေးမေးမြန်းတာတွေကြောင့် ထွက်ကုန်တွေကို ကျေးရွာတွေမှာ ရတဲ့ဈေးနဲ့ ရောင်းချနေရတယ်လို့ ဖာလာစိုက်တောင်သူတွေက ပြောပါတယ်။
စစ်တပ်က အာဏာသိမ်းပြီးနောက်ပိုင်း နိုင်ငံရေးမတည်ငြိမ်တာ၊ ကုန်ဈေးနှုန်းကြီးမြင့်တာ၊ လုပ်သားခကြီးမြင့်တာ၊ ဒေသထွက်ကုန်တွေ အထွက်နည်းလာတာတွေကြောင့် တောင်သူတွေဟာ အရှုံးတွေနဲ့ ရင်ဆိုင်နေရပါတယ်။
ဖာလာကုန်သည်တဦးက “ဖာလာက မထွက်တော့ တောင်သူတွေအတွက် အဆင်မပြေဘူး။ သူတို့ တနှစ်လုံးမှာ ဖာလာကို အားကိုးပြီးစားရတာ။ ဖာလာမရှိတော့ ကုန်သည်တွေလည်း ဒုက္ခရောက်၊ သူတို့လည်း အဆင်မပြေဘူး” လို့ ပြောပါတယ်။
ဒါ့အပြင် တောင်ငူ-လိပ်သို ကားလမ်းတလျှောက်က စစ်ကောင်စီရဲ့ စစ်တောင်းဂိတ်၊ ၄ မိုင်ဂိတ်၊ ၇ မိုင်ဂိတ် အပါအဝင် တပ်စခန်းတွေက ဒေသခံပြည်သူတွေ တောင်ငူမြို့ကနေ ဝယ်ယူလာတဲ့ ဆန်နဲ့ မီးဖိုချောင်သုံး စားနပ်ရိက္ခာတွေကို သယ်ယူခွင့်မပြုဘဲ ကန့်သတ်ထားပါတယ်။
