အိန္ဒိယနိုင်ငံ၊ မဏိပူရပြည်နယ်၊ မိုးရေးမြို့မှာ မြန်မာနိုင်ငံသားတဦး အပါအဝင် ကူကီးလူမျိုး ၇ ဦးကို နိုဝင်ဘာ ၄ ရက်မှာ မဏိပူရပြည်နယ်ရဲတပ်ဖွဲ့က လက်နက်ခဲယမ်းတွေနဲ့အတူ ဖမ်းဆီးရမိခဲ့တယ်လို့ မဏိပူရအခြေစိုက် မီဒီယာတခုဖြစ်တဲ့ The Sangai Express မှာ ဖော်ပြထားပါတယ်။
မိုးရေးမြို့မှာ အောက်တိုဘာ ၃၁ ရက်က မဏိပူရပြည်နယ်ရဲတပ်ဖွဲ့မှူး အနန်ကူးပါး လုပ်ကြံခဲ့ရပြီးနောက်ပိုင်း မဏိပူရပြည်နယ်ရဲတပ်ဖွဲ့၊ ဗဟိုအရန်တပ်ဖွဲ့နဲ့ လုံခြုံရေးတပ်ဖွဲ့ဝင်တွေက မိုးရေးမြို့ထဲမှာ ရှာဖွေရေးလုပ်ငန်းတွေ ဆက်တိုက်လုပ်နေပြီး နိုဝင်ဘာ ၄ ရက် မနက် ၈ နာရီလောက်က မြန်မာနိုင်ငံသားတဦးအပါအဝင် ကူကီးလွတ်မြောက်ရေးတပ်ဖွဲ့ (UKLF) မှ သံသယရှိသူ ၇ ဦးကို လက်နက်ခဲယမ်းတွေနဲ့အတူ ဖမ်းဆီးရမိခဲ့ပါတယ်။
မြန်မာနိုင်ငံသားတဦး အပါအဝင် ကူကီးလူမျိုး ၇ ဦးဆီက ကျည် ၁၀၂ တောင့်၊ တရုတ်ထုတ် လက်ပစ်ဗုံး ၁ လုံး၊ ကျည်ကာအင်္ကျီ ၁ ထည်၊ ကျည်ခါးပတ် ၁ ခု၊ သေနတ်ယမ်း ၁၀ ဂရမ်၊ အမိုနီယမ်နိုက်ထရိတ် ၂,၅၁၅ ဂရမ်၊ ဆာလဖာမုန့် ၆၀ ဂရမ်၊ လက်ကိုင်ဖုန်း ၄ လုံးနဲ့ သက်သေခံကတ်ပြား ၄ ခုတို့ သိမ်းဆည်းရမိခဲ့တယ်လို့ ရဲတပ်ဖွဲ့က ထုတ်ပြန်ခဲ့ပါတယ်။
တဖက်မှာလည်း ကူကီးလွတ်မြောက်ရေးတပ်ဖွဲ့ (UKLF) အဖွဲ့က သံသယရှိသူတွေက နိုဝင်ဘာ ၄ ရက်နေ့မှာပဲ မိုးရေးမြို့ကို တာဝန်ထမ်းဆောင်ဖို့ လာရောက်တဲ့ အစိုးရအရာရှိတွေနဲ့ ဝန်ထမ်းတချို့ကို လမ်းမှာကြားဖြတ်တားစီးပြီး မိုးရေးမြို့ကို နောက်တခါ မလာရောက်ဖို့ ခြိမ်းခြောက် ပြန်လွှတ်ခဲ့ပါတယ်။
အောက်တိုဘာ ၃၁ ရက်က မိုးရေးမြို့ စာသင်ကျောင်းမှာ ရဟတ်ယာဉ်ကွင်း တည်ဆောက်ဖို့ မဏိပူရပြည်နယ် ရဲတပ်ဖွဲ့မှူး အနန်ကူးပါး နေရာလာကြည့်စဉ် စနိုက်ပါနဲ့ ပစ်ခတ်လုပ်ကြံခံရပြီး သေဆုံးခဲ့ပါတယ်။
ရဲအရာရှိ သေဆုံးမှုနဲ့ ပတ်သက်ပြီး နိုဝင်ဘာ ၁ ရက်က မြန်မာနိုင်ငံသား ၃၂ ဦး အပါအဝင် ၄၄ ဦး ဖမ်းဆီးခံခဲ့ရပြီး နိုဝင်ဘာ ၂ ရက်နေ့မှာ မြန်မာနိုင်ငံသား ၁၀ ဦးကို ဆာဂျီဝါမြို့ရှိ နိုင်ငံခြားအကျဉ်းထောင်ကို ရဟတ်ယာဉ်နဲ့ ပို့ဆောင်ခဲ့ပါတယ်။
Source-The Sangai Express
