မကွေးတိုင်း၊ ဂန့်ဂေါနဲ့ မြိုင်မြို့တို့မှာ စစ်ကောင်စီတပ်တွေ တိုက်ခိုက်ခံရလို့ ၁၀ ယောက်ထက်မနည်းသေဆုံးပြီး အဖွားအိုတယောက်ကို သတ်ဖြတ် မီးရှို့ခဲ့သလို စစ်ကိုင်းတိုင်း၊ မုံရွာမြို့မှာလည်း စစ်စခန်းတိုက်ခိုက်ခံရပြီး စစ်သား ၁၅ ယောက် သေဆုံးခဲ့တယ်လို့ ကာကွယ်ရေးတပ်ဖွဲ့တွေဆီကနေ သိရပါတယ်။

နိုဝင်ဘာ ၃ ရက် မနက်ပိုင်းက ဂန့်ဂေါမြို့နယ်၊ မင်းရွာရဲစခန်းကို ပြည်သူ့ကာကွယ်ရေး ပူးပေါင်းတပ်တွေက တိုက်ခိုက်သိမ်းပိုက်ခဲ့ပြီး စစ်ကောင်စီဘက်က အရာရှိ ၁ ယောက် အပါအဝင် ၁၀ ယောက် ထက်မနည်း သေဆုံး၊ ၁၀ ယောက်လောက် အရှင်ဖမ်းမိတယ်လို့ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး ABSDF-Column 3 ဆီကနေ သိရပါတယ်။

တိုက်ပွဲအတွင်းမှာ  ပြည်သူ ၂ ယောက်လည်း သေဆုံးခဲ့တယ်လို့ သိရပြီး ရဲစခန်းတခုလုံးကို အောင်အောင်မြင်မြင် သိမ်းပိုက်နိုင်ခဲ့ပြီး မီးရှို့ဖျက်ဆီးခဲ့သလို လက်နက်ခဲယမ်းတွေလည်း သိမ်းဆည်းရရှိခဲ့တယ်လို့ ဆိုပါတယ်။

အဲဒီတိုက်ခိုက်မှုအတွင်း ပြည်သူ့ကာကွယ်ရေး ရဲဘော် ၁၀ ယောက်လောက် ပွန်းပဲ့ဒဏ်ရာတွေရရှိခဲ့ပြီး ဒဏ်ရာ အခြေအနေကတော့ မစိုးရိမ်ရဘူးလို့ ဆိုပါတယ်။

မြိုင်မြို့နယ်မှာတော့ နိုဝင်ဘာ ၂ ရက် ည ၁၂ နာရီလောက်က ပခုက္ကူမြို့ဘက်ကနေ မြိုင်မြို့ဘက်ကို ထွက်လာတဲ့ အင်အား ၁၀၀ လောက်ပါတဲ့ စစ်ကောင်စီကား ၄ စီးကို မြိုင်မြို့နယ်၊ ကျောက်ဆောက်နဲ့ ထန်းငယ်တောရွာကြားမှာ ပဒေသာမိုင်း ၃ ပွိုင့်၊ ပေပါမိုင်း ၃ ပွိုင့်နဲ့ မိုင်းဆွဲတိုက်ခိုက်ခဲ့တယ်လို့ မြိုင်ပကဖရဲ့ ပြန်ကြားရေးတာဝန်ခံ ကိုသုခက ဒီဗွီဘီကို ပြောပါတယ်။

အဲဒီတိုက်ခိုက်မှုအတွင်းမှာ စစ်ကောင်စီဘက်က ထိခိုက်သေဆုံးသူရှိနိုင်ပြီး လူနာတွေလည်း မြိုင်ပြည်သူ့ဆေးရုံကို ရောက်နေတယ်လို့ သတင်းကြားတယ်လို့ ဆိုပါတယ်။

တိုက်ပွဲအတွင်းမှာ အထိနာသွားတဲ့ စစ်ကောင်စီစစ်ကြောင်းဟာ စီလောင်ကျေးရွာကို ဝင်ရောက်ပြီး အသက် ၇၀ ကျော်အရွယ် အဘွားအိုတယောက်ကို မီးရှို့သတ်ဖြတ်ကာ နေအိမ် ၃ လုံးကိုလည်း မီးရှို့ဖျက်ဆီးခဲ့ကြတယ်လို့ ပြောပါတယ်။

စစ်ကိုင်းတိုင်း၊ မုံရွာမြို့အနီး၊  မုံရွာ-အမြင့်လမ်းပိုင်း ညောင်ပင်သာကျေးရွာက စစ်ကောင်စီ အထိုင်ချစခန်းကို ဒေသခံကာကွယ်ရေးတပ်ဖွဲ့‌တွေက နိုဝင်ဘာ ၁ ရက် ညနေပိုင်းမှာ ဝင်ရောက်တိုက်ခိုက်ခဲ့ပြီး စစ်သား ၁၅ ယောက် သေဆုံးခဲ့တယ်လို့ ကာကွယ်ရေး တပ်ဖွဲ့တွေဆီကနေ သိရပါတယ်။

စစ်သားတွေဘက်က အထိနာနေလို့ မအူဂိတ်က စစ်ကူတွေ ရောက်လာပြီး သေဆုံးသွားတဲ့ စစ်သားတွေနဲ့ အနီးနားရှိ အရပ်သားပြည်သူပိုင် နေအိမ် ၇ လုံးကို မီးရှို့သွားတယ်လို့ ကာကွယ်ရေးရဲဘော်တွေဆီကနေ သိရပါတယ်။

‌တိုက်ခိုက်ရာမှာ ပါဝင်တဲ့ ဗိုလ်ငယ်လေးက “RPG-7 နဲ့ အရင်ပစ်တာ ဘန်ကာကိုထိပြီး ပြိုသွားတာ။ အဲတချက်ကိုက ၃ ယောက်လောက်သေတယ်။ ပစ်တာခတ်တာတွေနဲ့ဆို ၁၅ ယောက်သေတယ်။ အတွင်းဖရဲသီး ပြောချက်အရ သေသွားကြတယ်ဆိုတာ ပိုတိကျပြောနိုင်တာ” လို့ ပြောပါတယ်။

မအူဂိတ်ကနေ စစ်ကူတွေ အချိန်မီရောက်ရှိလာပြီး လက်နက်ကြီး လက်နက်ငယ်တွေနဲ့ ပစ်ခတ်တဲ့အတွက်ကြောင့် စစ်စခန်းကို မသိမ်းပိုက်နိုင်ဘဲ ကာကွယ်ရေးတပ်ဖွဲ့ဝင်တွေ အထိအခိုက်မရှိ ပြန်လည်ဆုတ်ခွာနိုင်ခဲ့တယ်လို့ သိရပါတယ်။

Chindwin Attack Force ရဲ့ ပြန်ကြားရေးတာဝန်ခံတယောက်က “ကျနော်တို့က စစ်ကြောင်း ၄ ကြောင်းနဲ့တိုက်တာ။ သူတို့ အခြေအနေမကောင်းတော့ စစ်ကူခေါ်လိုက်တာ၊ ချက်ချင်း ရောက်လာတယ်။ ဒဏ်ရာရသူတွေကိုတော့ သံချပ်ကာကား ၃ စီးနဲ့ မုံရွာဘက်ကို ပြန်သယ် သွားကြတယ်” လို့ ပြောပါတယ်။

တိုက်ခိုက်မှုကို မုံရွာခရိုင်အမှတ်-၄ တပ်ရင်း (Chindwin Attack Force)၊ မုံရွာခရိုင် တပ်ရင်း-၄ ရဲ့ အထူးကွန်မန်ဒိုတပ်ဖွဲ့ (Monywa The Boys)၊ မုံရွာခရိုင်တပ်ရင်း-၄၊ တပ်ခွဲ-၁ Spring Dove PDF၊ မုံရွာခရိုင်တပ်ရင်း-၄၊ တပ်ခွဲ-၃ Monywa Nightking PDF၊ မုံရွာခရိုင်တပ်ရင်း-၁၃၊ Monywa Special ဒိတ်ဒိတ်ကြဲ၊ မုံရွာခရိုင်ပကဖ၊ 5/UG Task Force၊Monywa Commando Force၊ Unity Force၊ SRDF ကာကွယ်ရေးတပ်ဖွဲ့နဲ့ ဒဿ ပြောက်ကျားတပ်ဖွဲ့တို့ ပူးပေါင်းဆင်နွှဲခဲ့တာ ဖြစ်ပါတယ်။

တိုက်ပွဲဖြစ်ပွားပြီးနောက်မှာ တိုက်ခိုက်ခံရတဲ့ ညောင်ပင်သာရွာစခန်းကို စစ်သား‌တွေ အင်အားဖြည့်ကာ ပြန်လည်တပ်စွဲထားတယ်လို့ သိရပါတယ်။