စစ်ကိုင်းတိုင်း၊ ဟုမ္မလင်းနဲ့ ဖောင်းပြင်မြို့နယ်တို့မှာ စစ်ကောင်စီစခန်းတွေကို ဒေသခံတော်လှန်ရေးတပ်တွေက သွားရောက်တိုက်ခိုက်ခဲ့ပြီး ဖောင်းပြင်မှာတော့ စစ်တပ်က လေယာဉ်နဲ့ လာရောက်ပစ်ခတ်နေပါတယ်။
ဟုမ္မလင်းမြို့နယ်၊ လွှစင်ကုန်းကျေးရွာမှာ တပ်စွဲထားတဲ့ စစ်အုပ်စုနဲ့ ရှမ်းနီအမျိုးသား တပ်မတော် SNA တပ်ဖွဲ့ကို ဒေသတွင်း တော်လှန်ရေးအင်အားစုတွေက နိုဝင်ဘာ ၂ ရက်နေ့ မနက် ၆ နာရီ ဝန်းကျင်အချိန်ကစလို့ ရှော့တိုက်ဒုံးတွေနဲ့ တနေကုန် ပစ်ခတ်တိုက်ခိုက်ခဲ့ပြီး ပစ်မှတ်ပေါ်တည့်တည့် ၅ ကြိမ်ထက်မနည်း ကျရောက်ပေါက်ကွဲခဲ့တယ်လို့ ဟုမ္မလင်းမြို့နယ် HPDF -124 တပ်ဖွဲ့က ထုတ်ပြန်ပြောဆိုပါတယ်။
HPDF -124 တာဝန်ရှိသူတယောက်က “မနက် ၈ နာရီလောက်မှာတော့ ခန္တီးခရိုင် အမှတ် ၁ တပ်ရင်း၊ HPDF-124 တပ်ရင်း၊ HPDF မိုးကြိုး တပ်ဖွဲ့၊ ဟုမ္မလင်းမြို့နယ် ပြည်သူ့လုံခြုံရေးတပ်ဖွဲ့(ဟုမ္မလင်း-ပလဖ) ပူးပေါင်းတပ်ဖွဲ့တို့က စစ်ကြောင်း ၂ ကြောင်းနဲ့ ဝင်ရောက်တိုက်ခိုက်ခဲ့တယ်။ တိုက်ပွဲက ညနေ ၅ နာရီ လောက်အထိ ကြာခဲ့ပြီး ပူးပေါင်းတပ်ဖွဲ့တွေ ထိခိုက်ကျဆုံးတာမရှိဘဲ လွှစင်ကုန်းရွာမှာ ဆက်လက် တပ်စွဲထားလျက် ရှိပါတယ်။ စစ်တပ်ဘက်က ထိခိုက်သေဆုံးတာတော့ရှိမယ်၊ အရေအတွက်တော့ မသိရသေးဘူး။ စစ်တပ်ဘက်က စခန်းကို ပြန်ရချင်တော့ အတင်းပြန်စစ်ထိုးနေတယ်” လို့ ပြောပါတယ်။
တိုက်ပွဲဖြစ်နေတုန်း နောင်ပိုအောင်ဘက်မှာရှိတဲ့ စစ်တပ်ဘက်က လက်နက်ကြီးနဲ့ပစ်ကူပြီး ရမ်းသမ်းပစ်ခတ်တာကြောင့် အောင်ပင်ရွာက ရွာသား ၁ ယောက် ထိခိုက်ဒဏ်ရာ နည်းနည်းရခဲ့ပြီး ပူးပေါင်းတပ်ဖွဲ့ဝင်တွေက ဆေးဝါးကုသပေးနေတယ်လို့လည်း သူကဆက် ပြောပါတယ်။
ဒေသတွင်း PDF ပူးပေါင်းတပ်ဖွဲ့တွေဟာ လွှစင်ကုန်းရွာမှာ ဆက်လက်တပ်စွဲထားပြီး အကြမ်းဖက်စစ်တပ်နဲ့ အချိန်မရွေး တိုက်ပွဲပြန်လည်ဖြစ်နိုင်တာကြောင့် ပြည်သူတွေအနေနဲ့ သွားလာရာမှာ စစ်ရေးသတိအမြဲရှိကြဖို့လည်း HPDF -124 တပ်ဖွဲ့က အသိပေး ထုတ်ပြန်ထားပါတယ်။
စစ်ကိုင်းတိုင်း၊ ဖောင်းပြင်မြို့နယ်၊ ရေအောက်တောင်းကျေးရွာမှာ တပ်စွဲထားတဲ့ စစ်တပ် အခြေပြုစခန်းကို ဒေသတွင်း PDF တော်လှန်ရေး ပူးပေါင်းတပ်ဖွဲ့တွေက နိုဝင်ဘာ ၁ ရက်နေ့က ဝင်ရောက် ထိုးစစ်ဆင်တိုက်ခိုက်ခဲ့ပြီး နိုဝင်ဘာ ၂ ရက်နေ့အထိ တိုက်ပွဲပြင်းထန်ခဲ့သလို စစ်တပ်ဘက်က လေယာဉ်ပစ်ကူနဲ့ ဗုံးကြဲတိုက်ခိုက်ခဲ့တယ်လို့ ဒေသခံတွေဆီက သိရပါတယ်။
ဒေသခံတယောက်က “နေ့လယ်ပိုင်းမှာ အကြမ်းဖက် စစ်တပ်က ရဟတ်ယာဉ် ၃ စင်းနဲ့ ကရား၊ သာစည်၊ မိုးကောင်း၊ ကွန်းတော၊ မဲတင်ရွာနဲ့ မြို့မရွာတွေကို ပစ်ခတ်တယ်။ ရွာသားထောင်ချီ ဘေးလွတ်ရာကို ထွက်ပြေးတိမ်းရှောင်နေရတယ်။ ၂ ရက်နေ့မှာလည်း တိုက်ပွဲ ဆက်လက် ပြင်းထန်နေပြီး မနက် ၁၀ နာရီဝန်းကျင်လောက်မှာ စစ်တပ်ဘက်က လေယာဉ် ၂ စင်းနဲ့ ကွန်းတော၊ ကရား၊ သာစည်၊ မိုးကောင်းရွာတွေကို လေယာဉ်ပေါ်ကနေ စက်သေနတ်နဲ့ ပစ်တယ်။ လက်နက်ကြီး တွေနဲ့လည်းပစ်တယ်” လို့ ပြောပါတယ်။
ဖောင်းပြင်မြို့ဘက်ကနေလည်း စစ်တပ်ဘက်က ချင်းတွင်းမြစ်ရေကြောင်းကနေ စစ်ကူ သင်္ဘောတွေ စုန်ဆင်းလာတယ်လို့ ဒေသခံတွေက ပြောဆိုပါတယ် ။
နှစ်ဖက်ထိခိုက် သေဆုံးမှုအခြေအနေကိုတော့ တိုက်ပွဲပြင်းထန်ပြီး စစ်ရေးတင်းမာနေသလို သွားလာရေးခက်ခဲပြီး အဆက်အသွယ်ပြတ်တောက်နေလို့ မသိရသေးပါဘူး။
