ရန်ကုန်၊ လှိုင်သာယာ(အရှေ့ပိုင်းမြို့နယ်)၊ ရှမ်းချောင်းကျေးရွာမှာ အောက်တိုဘာ ၂၈ ရက် ညပိုင်းက နေအိမ် ၂၉ လုံးမီးလောင်ခဲ့တာကြောင့် လူ ၁၂၀ ကျော် မီးဘေးသင့်သွားတယ်လို့ မြန်မာမီးသတ်ဌာနချုပ်က ထုတ်ပြန်ပါတယ်။
မီးလောင်မှုဟာ ည ၇ နာရီ ၅ မိနစ် လောက်ကတည်းက စတင်ခဲ့တာဖြစ်ပြီး ည ၇ နာရီ ၁၅ မိနစ်မှာ လှိုင်သာယာမီးသတ်ယာဉ်တွေ ရောက်ရှိခဲ့တာ ဖြစ်ပါတယ်။
ရပ်ကွက်နေထိုင်သူတွေရဲ့ ပြောကြားချက်အရ အောင်ချမ်းသာလမ်းထောင့်က လျှပ်စစ်ထရန်စဖော်တာ ပေါက်ထွက်ရာကနေ အိမ် ၆ လုံး မီးလောင်ခဲ့တာလို့ သိရပါတယ်။
မီးဟာ လမ်းထဲက လူနေအိမ်တွေကို ကူးစက်လာတာကြောင့် ည ၇ နာရီ ၂၄ မိနစ်လောက်မှာ Level 1 အဆင့် မီးသတ်ယာဉ်အုပ်စုတွေနဲ့ အရပ်ဖက်အသင်းတွေ ထွက်ခွာ ငြှိမ်းသတ်ခဲ့ကြပါတယ်။
အရပ်ဖက်ကယ်ဆယ်ရေးအသင်းဝင်တယောက်က “level မလွှတ်ခင်မှာ အိမ် ၆ လုံးလောက် မီးကူးနေပါပြီ။ အားလုံး အလုံး ၃၀ လောက် လောင်သွားတယ်။ မီးလောင်တော့ လန့်ပြီးပြေးတဲ့ တဦးက သွပ်ပြားရှဒဏ်ရာရပါတယ်။ လောလောဆယ်တော့ ရှမ်းချောင်း( မြောက်) ဓမ္မာရုံမှာပါ” လို့ ပြောပါတယ်။
မီးလောင်မှုအတွင်း သွပ်မိုးပျဉ်ခင်းထရံကာအိမ်တွေနဲ့ အုတ်ခံကျောက်ပြားကာ ၂ ထပ်အိမ် စုစုပေါင်း ၂၈ လုံးနဲ့ ၅ ခန်းတွဲ အဆောင် ၁ ခု ပျက်စီးသွားပြီး အရပ်သား ၁ ယောက် ခြေထောက်ပြတ်ရှ ဒဏ်ရာတွေ ရရှိခဲ့ပါတယ်။
လှိုင်သာယာမြို့နယ်မီးသတ်ယာဉ်တွေ၊ ထိစပ်မြို့နယ်တို့က မီးသတ်ယာဉ်၊ ရေသယ်ယာဉ်တွေနဲ့ အရပ်ဖက်အသင်း ၂၀ ကျော်တို့က ရေသယ်ယာဉ်၊ လူနာတင်ယာဉ်တွေနဲ့ ငြှိမ်းသတ်ခဲ့တာကြောင့် ည ၇ နာရီ မိနစ် ၄၀ လောက်မှာ မီးငြိမ်းသွားပါတယ်။
မီးလောင်မှုရဲ့ အကြောင်းအရင်းအမှန်နဲ့ ပျက်စီးမှုတန်ဖိုးကို မြို့နယ်မီးသတ်တပ်ဖွဲ့က စစ်ဆေးတွက်ချက်နေဆဲဖြစ်ပြီး အိမ် ၂၈ လုံး၊ အဆောင် ၁ ခုတို့ရဲ့ လူ ၁၂၀ ကျော်ဟာ ရှမ်းချောင်းဓမ္မာရုံမှာ ယာယီမီးဘေးရှောင်နေကြပါတယ်။
