ရန်ကုန်၊ ကြည့်မြင်တိုင်မြို့နယ်နဲ့ လှည်းကူးမြို့နယ်တို့မှာ အောက်တိုဘာ ၂၇ ရက်နေ့က ယာဉ်တိုက်မှုတွေကြောင့် ၁ ယောက်သေပြီး ၅ ယောက် ဒဏ်ရာရခဲ့တယ်လို့ မြို့ခံကယ်ဆယ်ရေးအသင်းတွေက ပြောပါတယ်။
ကြည့်မြင်တိုင်မြို့နယ်၊ ကမ်းနားလမ်း၊ စာတိုက်မှတ်တိုင်အနီးမှာ ညနေ ၄ နာရီလောက်က လှိုင်သာယာ- သခင်မြပန်းခြံပြေးဆွဲတဲ့ YBS 130 ကို မြောက်ဥက္ကလာ- သခင်မြပန်းခြံ ပြေးဆွဲတဲ့ YBS 19 က အနောက်ကနေ ဝင်တိုက်ခဲ့ပြီး YBS 19 ကို ကုန်တင်တွဲကားက ထပ်တိုက်မိတာ ဖြစ်ပါတယ်။
ရောင်စဉ်မဲ့လူမှုကူညီရေးအသင်းတာဝန်ရှိသူက “YBS 19 က လူနာ ၃ ဦးထွက်ပါတယ်။ ၁ ဦးက ထိထားတာ များတယ်။ YBS ၂ စီးတိုက်နေချိန်မှာ အနောက်က တွဲကားက လမ်းလွတ်တယ်အထင်နဲ့ ဖြတ်မောင်းရင်း ထပ်တိုက်မိကြတာ။ အားလုံးကို ရန်ကုန်ဆေးရုံကြီးကို ပို့ပေးထားပါတယ်” လို့ ပြောပါတယ်။
ကား ၃ စီးဆင့်တိုက်ခဲ့တာကြောင့် YBS 19 ပေါ်ပါ ခရီးသည် အမျိုးသား ၁ ဦးမှာ ထိခိုက်မှုပြင်းထန်ဒဏ်ရာ၊ အမျိုးသမီး ၂ ဦးမှာ မစိုးရိမ်ရဒဏ်ရာတွေ ရရှိခဲ့ပြီး ကယ်ဆယ်ရေးအသင်းယာဉ်တွေနဲ့ ရန်ကုန်ပြည်သူ့ဆေးရုံကြီးကို ပို့ဆောင်ပေးခဲ့ပါတယ်။
အဲဒီနေ့မှာပဲ မနက် ၁၀ နာရီလောက်က လှည်းကူးမြို့နယ်၊ ရန်ကုန်အမြန်လမ်း ၆ မိုင် နားမှာ လမ်းဘေးကာထားတဲ့ သံလက်ရန်းကို လူ ၄ ယောက်ပါလာတဲ့ လူနာတင်ယာဉ်က ဝင်တိုက်မိခဲ့ပါတယ်။
အဲဒီလူနာတင်ယာဉ်ဟာ ပဲခူး၊ ကျောက်တံခါးမြို့နယ်ကနေ အသက် ၈၀ ကျော် အမျိုးသားလူနာ ၁ ယောက်ကို ရန်ကုန်ဆေးရုံပြသဖို့ တင်ဆောင်လာခဲ့တာဖြစ်ပါတယ်။
ထိန်တောပရဟိတလူငယ်အဖွဲ့ဝင်တဦးက “DB ဖြစ်သွားတာက လူနာပါ။ အသက် ၈၀ ကျော်တဲ့ အမျိုးသား ၁ ဦးပါ။ ဒဏ်ရာရတဲ့ အမျိုးသမီးက ညှပ်ရိုးကျိုးသွားတယ်၊ ယာဉ်မောင်းက အသင်းက ဥက္ကဋ္ဌပါ။ ၉၉ မိုင် ၄ ဖာလုံကနေ ရန်ကုန်ဆေးရုံကို မောင်းလာတာပါ” လို့ ပြောပါတယ်။
ယာဉ်တိုက်မှုဖြစ်လို့ ဆေးရုံပြသမယ့် လူနာအမျိုးသား သေဆုံးသွားပြီး လူနာရှင် အမျိုးသမီး ၁ ယောက်မှာ ညှပ်ရိုးကျိုးဒဏ်ရာ၊ အမျိုးသား ၁ ယောက်မှာ ခါးထိခိုက်ဒဏ်ရာတွေရရှိခဲ့ကာ ယာဉ်မောင်းဖြစ်သူကတော့ ပွန်းပဲ့ဒဏ်ရာတွေ ရရှိ ခဲ့တာကြောင့် သက်ဆိုင်ရာဆေးရုံကို ကယ်ဆယ်ရေးအသင်းတွေက ပို့ဆောင် ပေးခဲ့ပါတယ်။
