စစ်ဆင်ရေး ၁၀၂၇ ကနေ လားရှိုးနဲ့ နမ့်ခမ်းမြို့နယ်ထဲမှာ စစ်ကောင်စီတပ်စခန်း ၂ ခုကို ဝင်ရောက်တိုက်ခိုက် သိမ်းပိုက်နိုင်ပြီး စစ်ကောင်စီအလောင်း ၁၈ လောင်းနဲ့ လက်နက်ခဲယမ်းတွေ သိမ်းဆည်းရမိခဲ့တယ်လို့ တအာင်းတပ်မတော် PSLF/TNLA က ဒီနေ့ ထုတ်ပြန်လာပါတယ်။
ကိုးကန့်၊ တအာင်းပလောင်နဲ့ ရခိုင် မဟာမိတ် ၃ ဖွဲ့ဟာ ရှမ်းပြည်နယ်မြောက်ပိုင်းမှာ စစ်ဆင်ရေး ၁၀၂၇ လို့ အမည်ပေးထားတဲ့ စစ်ဆင်ရေးတရပ်ကို အောက်တိုဘာ ၂၇ ရက် မနက်ပိုင်းက စတင်ဆင်နွှဲနေပြီး နေ့လယ်ပိုင်းအထိမှာတော့ ချင်းရွှေဟော်တံတား၊ ဟိုပန်ဒေသ ချွမ်းဟုတ်ရွာ၊ ကွမ်းလုံ၊ မုံးကိုးနဲ့ လားရှိးမြို့တို့က စစ်ရေးအဓိကကျတဲ့ နေရာအများအပြားကို သိမ်းပိုက် ချေမှုန်းနိုင်ခဲ့တယ်လို့ ထုတ်ပြန်ထားခဲ့ပါတယ်။
တအာင်းပြည်နယ် တပ်မဟာ ၆ စစ်ဒေသဖြစ်တဲ့ လားရှိုးမြို့နယ်မှာတော့ အောက်တိုဘာ ၂၇ ရက်နေ့ မနက်ပိုင်းမှာ မိုင်းကျက်တပ်စခန်းနဲ့ တိန်တန်တပ်စခန်းတို့ကို TNLA က တိုက်ခိုက်ခဲ့ပြီး နေ့လယ်ပိုင်းမှာ တိန်းတန်တပ်စခန်းကို သိမ်းပိုက်နိုင်ခဲ့တယ်လို့ ဆိုပါတယ်။
အဲဒီ တိုက်ပွဲအတွင်း သေနတ် ၁၄ လက်၊ RPG ၁ လက်၊ ၆၀ မမ ၂ လက်၊ စက်လက်အကြီး ၁ လက်၊ လက်ပစ်ဗုံး အလုံး ၂၀၀၊ RPG ကျည် အလုံး ၃၀၊ ၆၀ မမ ကျည် အလုံး ၅၀၊ မိုင်း၊ ကျည်ဆံတွေနဲ့ စစ်အသုံးအဆောင်ပစ္စည်းတွေ သိမ်းဆည်းရမိခဲ့တယ်လို့ ဆိုပါတယ်။
ပြီးတော့ တပ်မဟာ ၁ စစ်ဒေသ၊ နမ့်ခမ်းမြို့နယ်က နမ့်ခမ်း-နမ့်ဖတ်ကားလမ်း ၁၃ မိုင် တပ်စခန်း၊ ၁၂ မိုင် တပ်စခန်းနဲ့ မန်မိုင်တပ်စခန်း(မိုက်ခရိုဝိတ် တာဝါတိုင်တပ်စခန်း)တို့ကို အောက်တိုဘာ ၂၇ ရက် မနက်ပိုင်းမှာ တိုက်ခိုက်သိမ်းပိုက်နိုင်ခဲ့ပြီး စစ်ကောင်စီအလောင်း ၁၈ လောင်းနဲ့ လက်နက်ခဲယမ်းအများကြီးကို သိမ်းဆည်းရမိခဲ့တယ်လို့ ဆိုပါတယ်။
စစ်ကောင်စီဘက်ကတော့ လေကြောင်းကနေ ဂျက်ဖိုက်တာနဲ့ ၇ ကြိမ်၊ Mi-35 တိုက်ခိုက်ရေးရဟတ်ယာဉ်နဲ့ ၅ ကြိမ်တိုက်ခိုက်ခဲ့ပြီး ၁၂၀/၁၀၅ ဟောင်ဝေဇာ အမြောက်နဲ့လည်း တိုက်ပွဲဖြစ်တဲ့နေရာကို ပစ်ခတ်ခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
