“မနက် ၇ နာရီလောက်မှာ ရွာထဲ အိမ်ပေါ်တည့်တည့် လက်နက်ကြီးကျတာ၊ ကလေးတယောက်တော့ ပွဲချင်းပြီးပဲ။ တယောက်တော့ ဆေးရုံရောက်မှ ဆုံးသွားတာ” လို့ နီးစပ်သူတဦးက ပြောပါတယ်။
နမ့်ဖတ်ကာအခြေစိုက် စစ်ကောင်စီ ၁၂၃ တပ်က ပစ်လိုက်တဲ့ လက်နက်ကြီးက နမ့်ဖတ်ကာ ရပ်ကွက် ၄ ထဲ လေးလုံးထက်မနည်း ကျရောက်ပေါက်ကွဲလို့ အသက် ၇ နှစ်အရွယ် မထုက နေရာမှာတင် ပွဲချင်းပြီး သေဆုံးပြီး အသက် ၃၀ အရွယ် ဒေါ်နန်ဘောက်ကတော့ ဒဏ်ရာပြင်းထန်လို့ နမ့်ဖတ်ကာဆေးရုံမှာ သေဆုံးသွားခဲ့တယ်လို့ ဆိုပါတယ်။
အသက် ၆ နှစ်အရွယ် ကလေးတဦး အပါအဝင် အမျိုးသား ၃ ဦးနဲ့ အမျိုးသမီး ၂ ဦးကတော့ လက်နက်ကြီးကျည်စ ထိမှန်ဒဏ်ရာရလို့ နမ့်ဖတ်ကာဆေးရုံမှာ ကုသမှု ခံယူနေရပါတယ်။
အောက်တိုဘာ ၂၇ ရက် မနက် ၄ နာရီကစပြီး ရှမ်းမြောက်တခွင်က စစ်ကောင်စီ တပ်စခန်းတွေကို မြောက်ပိုင်းညီနောင်မဟာမိတ်အဖွဲ့၊ ကချင်လွတ်မြောက်ရေးတပ်မတော် KIA၊ ကိုးကန့်တပ် MNDDA တပ်ဖွဲ့တွေ တပြိုင်တည်း တိုက်ပွဲဖော်ဆောင်ခဲ့ကြတာလည်း ဖြစ်ပါတယ်။
Photo - မေတ္တာရှင် လူမှုကူညီရေးအသင်း
