မြန်မာနိုင်ငံတဝန်းရှိ ပြည်နယ်နဲ့တိုင်းတွေမှာ ၂၀၂၃ ခုနှစ် ဇန်နဝါရီမှ စက်တင်ဘာလအထိ ယာဥ်တိုက်မှု ၃၆၃၄ ကြိမ်ဖြစ်ခဲ့ပြီး ၁,၈၆၄ ဦး သေဆုံးကာ ၄,၉၉၃ ဦး ဒဏ်ရာရရှိခဲ့တယ်လို့ ပြည်ထဲရေးနဲ့နီးစပ်သူတွေဆီက သိရပါတယ်။
ယာဥ်တိုက်မှုတွေကို ပြည်ထဲရေးဝန်ကြီးဌာနနဲ့ ပို့ဆောင်ရေးနှင့်ဆက်သွယ်ရေးဝန်ကြီးဌာနက ပူးပေါင်းထုတ်ပြန်တာလို့ ယာဥ်ထိန်းရဲတပ်ဖွဲ့မှ အရာရှိတဦးက ဒီဗွီဘီကို ပြောပါတယ်။
"အရင်က ပြည်ထဲရေးကပဲ ထုတ်တာ၊ အခုက ပို့ဆောင်ရေးနဲ့ဆက်သွယ်ရေးက သတင်းအချက်အလက်ကို ထုတ်ပြန်တာ။ ဒီနှစ် ၉ လတာစာရင်းမှာ ရန်ကုန်က ယာဥ်တိုက်မှုရော၊ သေတဲ့သူရော ပိုများတယ်။"
ပြီးခဲ့တဲ့ ၂၀၂၂ ခုနှစ်က ဇန်နဝါရီလမှ စက်တင်ဘာလအထိ ယာဉ်တိုက်မှုပေါင်း ၄၂၈၂ ကြိမ်ဖြစ်ခဲ့ပြီး ၂၁၀၂ ဦး သေဆုံးကာ ၅၉၁၁ ဦး ဒဏ်ရာရရှိခဲ့ပါတယ်။
အလားတူပင် ၂ဝ၂၁ ခုနှစ် ဇန်နဝါရီလမှ စက်တင်ဘာလအတွင်းမှာလည်း ယာဥ်တိုက်မှု ၄၈၃၆ ကြိမ်ဖြစ်ခဲ့ပြီး ၂၃၉၈ ဦး သေဆုံးခဲ့ပါတယ်။
