ရန်ကုန်၊ လှည်းကူးမြို့နယ်က ငမိုးရိပ်ရေလှောင်တမံမှာ ပြီးခဲ့တဲ့ ရက်ပိုင်းကတည်းက ရေပြည့်မှတ်ထက်ကျော်နေပြီး ဒီနေ့ အောက်တိုဘာ ၈ ရက် မနက်က စတင်လို့ ရေပိုလွှဲကနေ ၄ ပေအထိ ရေကျော်ခဲ့တာကြောင့် မြို့နယ်အတွင်း ရပ်ကွက်နဲ့ ကျေးရွာတွေမှာ ရေကြီးနေတယ်လို့ မြို့ခံတွေက ပြောပါတယ်။
ငမိုးရိပ်တမံနဲ့ ပတ်ဝန်းကျင်က ရေကူတမံတွေမှာ ပြီးခဲ့တဲ့ ၅ နှစ်အတွင်း ဒီနှစ်ဟာ မိုးရေချိန်နဲ့ ရေမှတ်အမြင့်ဆုံးကိုရောက်လာခဲ့တာပါ။
ငမိုးရိပ်တမံက စီးလာတဲ့ချောင်းရေဟာ လှည်းကူးမြို့နယ်ကို မြောက်ကနေ တောင်အထိ ဖြတ်သန်းစီးဆင်းသွားတာကြောင့် ချောင်းရိုးအနီးရှိ မြို့ပေါ်ရပ်ကွက်တွေဖြစ်တဲ့ ရိပ်သာ၊ အောင်မင်္ဂလာ၊ မြို့မ၊ ပြည်တော်သာ၊ ဈေးကြီးရပ်ကွက်တွေနဲ့ ဖောင်ကြီးဘက်က ရွာတွေမှာပါ ရေကြီးနေပြီး ရိပ်သာရပ်ကွက်က စာသင်ကျောင်းနဲ့ ရန်ကင်း စာသင်ကျောင်းပါ ပိတ်ထားရပါတယ်။
ငမိုးရိပ်တမံရေပြည့်အမှတ်ဟာ ၁၀၇ ပေဖြစ်ပြီး မိုးဆက်တိုက်ရွာနေခဲ့တာကြောင့် မိုးရေချိန် ၄ ဒသမ ၉၇ လက်မတိုးခဲ့ရာကနေ အောက်တိုဘာ ၈ ရက်နေ့မှာ တမံရေအမှတ်ဟာ ၁၁၁ ပေအထိ ရောက်ရှိသွားပြီး ရေပိုလွှဲကနေ ၄ ပေအထိ ရေကျော်သွားတာလို့ ငမိုးရိပ်ရေလှောင်တမံအဖွဲ့က ထုတ်ပြန်ထားပါတယ်။
မြို့ခံကယ်ဆယ်ရေးအသင်းဝင်တယောက်က “လောလောဆယ်က မြို့ပေါ် ၅ ရပ်ကွက်နဲ့ ဖောင်ကြီး၊ ကြို့ကုန်းစတာတွေမှာ ကယ်ဆယ်ရေးတွေ လုပ်နေပါတယ်။ မိုးတော်တော်ရွာတယ်။ အောက်ရေကမဆင်းဘဲ ထောက်နေတယ်။ ဒါကြောင့် ရေကြီးတာ။ လေဖြတ်လူနာ ၁ ဦးကိုတော့ ရေနဲ့ မလွတ်လို့ ရွေ့ပြောင်းပေးရတာ ရှိပါတယ်။ မြို့ပေါ်ရပ်ကွက်တွေမှာ ရေက လူကြီး ခါးဝက်လောက်ရှိတယ်။ ချောင်းနဲ့နီးတဲ့ တချို့နေရာတွေမှာ ရင်ခေါင်းလောက် ရှိပါတယ်။ ရိုးတို့ ချောင်းတို့နဲ့နီးတဲ့ မြေနိမ့်ပိုင်းရပ်ကွက်တွေမှာ ရေကြီးတာပါ” လို့ ပြောပါတယ်။
လှည်းကူးမြို့နယ်က ရပ်ကွက်တွေထဲကို မနက်ပိုင်းက စတင်ပြီး ၃ ပေလောက်အထိ ရေတက်လာခဲ့တာကြောင့် ရေဘေးစိုးရိမ်ရတဲ့ အိမ်ထောင်စုတွေကို လှည်းကူး ဘောလုံးကွင်းက အားကစားရုံနဲ့ ရေဘေးလွတ်တဲ့ ဘုန်းကြီးကျောင်းတွေမှာ မီးသတ်နဲ့ ကြက်ခြေနီအဖွဲ့က နေရာချပေးထားပြီး လေဖြတ်ဝေဒနာခံစားနေရတဲ့ အမျိုးသမီး ၂ ယောက်ကိုတော့ ဘေးလွတ်ရာ ပို့ဆောင်ပေးထားတယ်။
ရွှေ့ပြောင်းပေးရတဲ့ အိမ်ထောင်စုဦးရေကို သက်ဆိုင်ရာအဖွဲ့တွေက စာရင်းကောက်နေဆဲ ဖြစ်တယ်လို့သိရပြီး အရေးပေါ်ထောက်ပံ့ရေးပစ္စည်းတွေနဲ့ စားသောက်ကုန်၊ သောက်ရေသန့်တွေ လိုအပ်နေတယ်လို့ သိရပါတယ်။
ပြီးခဲ့တဲ့ စက်တင်ဘာ ၁၇ ရက်နေ့ကလည်း လှည်းကူးမြို့နယ်မှာ ရေကြီးခဲ့ပြီး လူ ၃၅၀ ကျော်ကို မီးသတ်တပ်ဖွဲ့၊ ကြက်ခြေနီနဲ့ သက်ဆိုင်ရာအဖွဲ့တွေက ရေဘေးလွတ်ကင်းရာကို ရွှေ့ပြောင်းပေးခဲ့ရပါတယ်။
