ချင်းပြည်နယ်၊ မတူပီမြို့နယ်အတွင်းရှိ စစ်ကောင်စီတပ်ရဲ့ မီးရှို့ခံခဲ့ရတဲ့ နေအိမ်နဲ့ စပါးကျီ ပိုင်ရှင်တွေကို ထောက်ပံ့ကြေး ပေးအပ်ခဲ့တယ်လို့ မြို့နယ်ပြည်သူ့အုပ်ချုပ်ရေးအဖွဲ့ထံက သိရပါတယ်။

မတူပီမြို့နယ်ထဲရှိ ကျေးရွာ ၁၀ ရွာက မီးရှို့ခံထားရတဲ့ နေအိမ်နဲ့ စပါးကျီတွေအတွက် ထောက်ပံ့ကြေး ပေးအပ်ခဲ့ကြောင်း စက်တင်ဘာ ၂၆ ရက်က မတူပီမြို့နယ် ပြည်သူ့အုပ်ချုပ်ရေးအဖွဲ့က ထုတ်ပြန်ပါတယ်။

ပြည်ပရောက် Indiana Matu Families & Friends, Chin Youth Organization - South Korea, Grace Myanmar Church, Florida စတဲ့အဖွဲ့အစည်းတွေရဲ့ ထောက်ပံ့ငွေတွေကို မြို့နယ် ပြည်သူ့အုပ်ချုပ်ရေးအဖွဲ့ကတဆင့် ပေးအပ်ခဲ့တာ ဖြစ်ပါတယ်။

မတူပီမြို့နယ်ထဲက ကလားရွာ၊ ဝလံတဲရွာ၊ ရဲန်ခဲန်းရွာ အပါအဝင် ကျေးရွာ ၁၀ ရွာက နေအိမ် ၅၅ လုံးနဲ့ စပါးကျီ ၄ လုံးကို ၂၀၂၂ နှစ်ကုန်ပိုင်းနဲ့ ၂၀၂၃ မတ်လကုန်ပိုင်းမှာ စစ်ကောင်စီတပ်က မီးရှို့ခဲ့တာဖြစ်တယ်လို့ သိရပါတယ်။

မြို့နယ် ပြည်သူ့အုပ်ချုပ်ရေးအဖွဲ့ တာဝန်ရှိသူက “မီးရှို့ခံခဲ့ရတဲ့အိမ်တွေက မိသားစုဝင်တွေကို ထောက်ပံ့ပေးခဲ့တာပါ။ ပြည်ပက အလှူရှင်တွေက ကျနော်တို့ မြို့နယ်အဖွဲ့အစည်းနဲ့ ချိတ်ဆက်ပြီးတော့ပေါ့၊ စုစုပေါင်း ၇၅ သိန်း ၅ သောင်း ပေးအပ်ခဲ့ပါတယ်” လို့ ပြောပါတယ်။

မတူပီမြို့နယ်ဟာ စစ်အာဏာသိမ်းပြီးကတည်းက တိုက်ပွဲတွေဖြစ်ပွားနေပြီး မတူပီမြို့ခံ ၈,၀၀၀ ကျော်လောက်က အိန္ဒိယနိုင်ငံ မီဇိုရမ်ပြည်နယ်ဘက်မှာ စစ်ဘေးတိမ်းရှောင် ခိုလှုံနေရတယ်လို့ သိရပါတယ်။