ဆိုလာပြားတွေနဲ့ လျှပ်စစ်ကားတွေ အပါအဝင် သန့်ရှင်းတဲ့ စွမ်းအင်နည်းပညာမှာ စံချိန်တင် တိုးတက်မှုဟာ ကမ္ဘာကြီး ပူနွေးလာမှုကို ၁ ဒသမ ၅ ဒီဂရီ စင်တီဂရိတ် (၂ ဒသမ ၇ ဒီဂရီ ဖာရင်ဟိုက်) ထက် ပိုမပူအောင် ကန့်သတ်ထားနိုင်တုန်းပဲလို့ အပြည်ပြည်ဆိုင်ရာ စွမ်းအင်အေဂျင်စီ (IEA) က စက်တင်ဘာ ၂၆ ရက်မှာ ပြောလိုက်ပါတယ်။
IEA ရဲ့ အမှုဆောင်ဒါရိုက်တာ ဖာတီ ဘီရိုးဟာ အဖွဲ့အစည်းရဲ့ ‘Net Zero Roadmap’ ကို အဆင့်မြှင့်တင်ချိန်မှာ ခုလိုပြောလိုက်တာပါ။
၂၀၅၀ ပြည့်နှစ်မှာ ဖန်လုံအိမ်ဓာတ်ငွေ့ အသားတင်ထုတ်လွှတ်မှု သုညထိရောက်ဖို့ အလားအလာတွေကို IEA ရဲ့ ‘Net Zero Roadmap’ က အဆိုပြုထားတာပါ။ အစီရင်ခံစာကို ၂၀၂၁ ခုနှစ်က စတင်ထုတ်ပြန်ခဲ့ပါတယ်။
ပထဝီဝင်နိုင်ငံရေး တင်းမာမှုတွေဟာ တိုးတက်မှုရရှိရေးအတွက် အကြီးမားဆုံး စိန်ခေါ်မှုတွေထဲက တခုဖြစ်တယ်လို့ ဘီရိုးက သတိပေးခဲ့ပြီး ရာသီဥတု အကျပ်အတည်းကို ဖြေရှင်းဖို့ အတူတကွ လုပ်ဆောင်ကြရေး အစိုးရတွေကို တောင်းဆိုခဲ့ပါတယ်။
၂၀၂၃ ခုနှစ်မှာ မျှော်မှန်းထားတဲ့ ဒေါ်လာ ၁ ဒသမ ၈ ထရီလီယံ အသုံးစရိတ်ထဲကနေ သန့်စင်တဲ့စွမ်းအင်ဆီ ကူးပြောင်းဖို့ တနှစ်ကို ဒေါ်လာ ၄ ဒသမ ၅ ထရီလီယံနီးပါး ရင်းနှီးမြှုပ်နှံဖို့လိုမယ်လို့ IEA က ပြောပါတယ်။
၂၀၃၀ ပြည့်နှစ်မှာ မီသိန်းဓာတ်ငွေ့ထုတ်လွှတ်မှု ၇၅ ရာခိုင်နှုန်း လျှော့ချရေးဟာ ခန့်မှန်းခြေအားဖြင့် ဒေါ်လာ ၇၅ ဘီလီယံလောက် ကုန်ကျမှာဖြစ်ပြီး ဒီကုန်ကျစရိတ်ဟာ ၂၀၂၂ ခုနှစ်မှာ ရေနံနဲ့ သဘာဝဓာတ်ငွေ့လုပ်ငန်းကရတဲ့ အသားတင်ဝင်ငွေရဲ့ ၂ ရာခိုင်နှုန်းလောက်သာ ရှိတယ်လို့ ရိုက်တာသတင်းဌာနက သုံးသပ် ဖော်ပြပါတယ်။
Source/Photo-Reuters
