မလေးရှားနိုင်ငံ၊တလော့ဂန်းမြို့မှာ တရားမဝင်ဖွင့်လှစ်ထားတဲ့ စက်ရုံတခုကို မလေးရှားရဲတပ်ဖွဲ့က စက်တင်ဘာ ၂၁ ရက်နေ့မှာ ဝင်ရောက်စီးနင်းပြီး အသက်မပြည့်သေးတဲ့ မြန်မာနိုင်ငံသား ၄ ဦးကို ကယ်တင်ခဲ့တယ်လို့ မလေးရှားမီဒီယာတခုဖြစ်တဲ့ The Star မှာ ဖော်ပြထားပါတယ်။

Bukit Aman CID ရဲ့ လူကုန်ကူးမှု တိုက်ဖျက်ရေးနဲ့ တရားမဝင် ရွှေ့ပြောင်းနေထိုင်သူများ တိုက်ဖျက်ရေးယူနစ် (D3) တို့က ပူးပေါင်းပြီး စက်တင်ဘာ ၂၁ ရက် ညနေ ၃ နာရီခွဲအချိန်မှာ အလုပ်သမားညွှန်ကြားမှု ဦးစီးဌာနအပါအဝင် တခြားအေဂျင်စီတွေနဲ့အတူ တရားမဝင်စက်ရုံကို ဝင်ရောက်စီးနင်းခဲ့ပါတယ်။

အသက် ၁၇ နှစ်သာရှိသေးတဲ့ မြန်မာနိုင်ငံသား အမျိုးသား ၃ ဦးနဲ့ အမျိုးသား ၁ ဦးတို့ဟာ လွန်ခဲ့တဲ့ ၂ လကနေ ၅ လအတွင်း တရားမဝင်စက်ရုံမှာ အလုပ်လုပ်ဖို့ လူကုန်ကူးခံခဲ့ရတယ်လို့ ရွှေ့ပြောင်းနေထိုင်သူများ တိုက်ဖျက်ရေး ဒါရိုက်တာ ဖာဒီမာဆပ်က ပြောပါတယ်။

"ကနဦးစုံးစမ်းစစ်ဆေးစစ်ဆေးမှုအရ အသက်မပြည့်သေးတဲ့ မြန်မာနိုင်ငံသား ၄ ဦး​ပါတယ်။ နောက်ပြီး တရားဝင်စာရွက်စာတမ်းအထောက် အထားမပါရှိတဲ့ အသက် ၂၁ နှစ် ၄၅ နှစ်ကြား ဘင်္ဂလားဒေ့ရှ်၊ နီပေါ၊ ကမ္ဘောဒီးယားနဲ့ မြန်မာနိုင်ငံတို့မှ အမျိုးသမီး ၁၀ ဦးအပါအဝင် အယောက် ၄၀ ကို ဖမ်းဆီး​စစ်ဆေးနေပါတယ်။"

မလေးရှားရဲတပ်ဖွဲ့က စက်ရုံမန်နေဂျာနဲ့ လက်ထောက်တို့ကိုလည်း လူးကုန်ကူးမှုနဲ့ တရားမဝင်စက်ရုံဖွင့်မှုတို့အတွက် ဖမ်းဆီးစစ်ဆေးနေပါတယ်။

စက်တင်ဘာ ၁၁ ရက်နေ့က မလေးရှားနိုင်ငံ၊ ဆီလန်ဂေါပြည်နယ်ရှိ KTV တခုမှာ အဓမ္မခိုင်းစေခံရတဲ့ မြန်မာအမျိုးသမီး ၄ ဦးကို မလေးရှားရဲတပ်ဖွဲ့က ကယ်တင်နိုင်ခဲ့ပါသေးတယ်။