၁၉ ကြိမ်မြောက် အာရှအားကစားပြိုင်ပွဲ အမျိုးသား ဘောလုံးပြိုင်ပွဲ အုပ်စုဒုတိယမြောက်ပွဲစဥ်ကို တရုတ်နိုင်ငံ ဟန်ကျိုးမြို့မှာ စက်တင်ဘာ ၂၁ ရက်က ယှဥ်ပြိုင်ကစားခဲ့ရာ မြန်မာ ယူ-၂၄ အသင်းက အိမ်ရှင်တရုတ် ယူ-၂၄ အသင်းကို ၄ ဂိုး ဂိုးမရှိနဲ့ ဂိုးပြတ်ရှုံးနိမ့်ခဲ့ပါတယ်။
အိမ်ရှင်တရုတ်အသင်းဟာ မြန်မာအသင်းကိုပွဲစကတည်းက တဖက်သတ်ဖိကစားပြီး ပထမပိုင်းမှာရရှိခဲ့တဲ့ သွင်းဂိုး ၄ ဂိုးနဲ့အတူ အနိုင်ရရှိခဲ့တာကြောင့် အုပ်စုဗိုလ်အဖြစ် နောက်တဆင့် တက်ရောက်နိုင်ခဲ့ပါတယ်။
အုပ်စုတွင်း တခြားပွဲစဥ်ဖြစ်တဲ့ အိန္ဒိယအသင်း နဲ့ ဘင်္ဂလားဒေ့ရှ်အသင်းတို့ပွဲစဥ်မှာ အိန္ဒိယအသင်းက ၁ ဂိုး ဂိုးမရှိနဲ့ အနိုင်ရရှိခဲ့ပါတယ်။
အုပ်စု (က) မှာ တရုတ်အသင်းက ရမှတ် ၆ မှတ်နဲ့ အုပ်စုပထမ၊ အိန္ဒိယအသင်းက ရမှတ် ၃ မှတ် သွင်းဂိုးအသာဖြင့် အုပ်စု ဒုတိယ၊ မြန်မာအသင်းက ရမှတ် ၃မှတ်နဲ့ အုပ်စုတတိယ၊ ဘင်္ဂလားဒေ့ရှ်က ရမှတ်မရှိနဲ့ အုပ်စုနောက်ဆုံးနေရာမှာ ရပ်တည်နေပါတယ်။
အာရှအားကစားအမျိုးသားဘောလုံးပြိုင်ပွဲတွင် အုပ်စု ၆ ခုမှ ပထမရ ၆ သင်း၊ ဒုတိယရ ၆ သင်း နဲ့ အကောင်းဆုံး တတိယ ၄ သင်းက နောက်တဆင့်ကို တက်ရောက်နိုင်မှာ ဖြစ်ပါတယ်။
မြန်မာအသင်းဟာ အုပ်စုနောက်ဆုံးပွဲစဥ်အဖြစ် အိန္ဒိယအသင်းနဲ့ စက်တင်ဘာ ၂၃ ရက်နေ့ မြန်မာစံတော်ချိန် ည ၆နာရီမှာ ကစားသွားမှာဖြစ်ပါတယ်။
Photo.MFF
