ရှမ်းပြည်နယ်မြောက်ပိုင်းရဲ့ မြို့တော်ဖြစ်တဲ့ လားရှိုးမြို့၊ ရပ်ကွက် ၂ ရှိ၊ CS ဟိုတယ်နဲ့ နယူးအာရှဟိုတယ်အကြား လမ်းမှာ စက်တင်ဘာ ၁၉ ရက် ညနေ ၅ နာရီခွဲဝန်းကျင်က ဗုံးပေါက်ကွဲလို့ လူ ၁ ဦး သေဆုံးပြီး ၄ ဦး ဒဏ်ရာရရှိတယ်လို့ ဒေသခံတွေဆီက သိရပါတယ်။
ဗုံးပေါက်ကွဲမှုမှာ အမျိုးသား ၁ ဦး သေဆုံးပြီး အမျိုးသား ၂ ဦးနဲ့ အမျိုးသမီး ၂ ဦး ထိခိုက် ဒဏ်ရာရသွားတာ ဖြစ်ပါတယ်။
အမျိုးသမီးလုပ်ငန်းရှင် ၁ ဦးက “CS ဟိုတယ်နား၊ အဲဒီနားက လူစည်တယ်လေ၊ တကယ့် လမ်းဆုံ လမ်းခွလေ၊ သူတို့ ပိုက်ဆံလာတောင်းတာ မပေးလို့ ထင်တယ်” လို့ ပြောပါတယ်။
ဗုံးကွဲမှုကြောင့် ဆိုင်ကယ် ၁ စီးနဲ့ ကား ၁ စီး ထိခိုက်သွားပြီး ကားကတော့ နယူးအာရှ ဟိုတယ် လမ်းထောင့်နားရှိ အောင်တံခွန် လားရှိုး-မန်တုံ ကားဂိတ်က ကားဖြစ်တယ်လို့ ဒေသခံ အမျိုးသားတဦးက ပြောပါတယ်။
“ကားမောင်းတဲ့ သူက မထိဘူး။ ကားမှန်တွေပဲ ကွဲ သွားတယ်။”
အဆိုပါ ဗုံးပေါက်ကွဲမှာ ဘယ်သူ့လက်ချက်လဲဆိုတာနဲ့ ဘာကြောင့် ဗုံးခွဲတယ်ဆိုတာကိုတော့ မသိရသေးပါဘူး။
ဇူလိုင် ၁၅ ရက် မနက် ၇ နာရီကျော်ကလည်း လားရှိုးဈေးကြီး ဇွဲထက်ရွှေဆိုင်မှာ မိုင်း ၁ လုံး ပေါက်ကွဲပြီး ရွှေဆိုင် ဝန်ထမ်း ၁ ဦး သေဆုံးကာ ၁၀ ဦး ကျော် ထိခိုက် ဒဏ်ရာရရှိခဲ့ ပါတယ်။
စစ်အာဏာသိမ်းပြီးနောက်ပိုင်း လားရှိုးမှာလည်း မကြာခဏ ဗုံးပေါက်ကွဲမှုဖြစ်ပွားတဲ့အပြင် ပြန်ပေးဆွဲမှု၊ ခြိမ်းခြောက် ငွေတောင်းတာတွေ၊ အမေရိကန် ဒေါ်လာနဲ့ တောင်းတာမျိုး မကြာခဏ ဖြစ်ပေါ်နေတယ်လို့ ဒေသခံတွေက ပြောပါတယ်။
