စစ်ကိုင်းတိုင်း၊ ဘုတလင်မြို့အဝင်မှာရှိတဲ့ စစ်ကောင်စီလုံခြုံရေးဂိတ်ကို စက်တင်ဘာ ၁၆ ရက် မနက်ပိုင်းမှာ ပြည်သူ့ကာကွယ်ရေး ပူးပေါင်းတပ်ဖွဲ့က ဝင်ရောက်တိုက်ခိုက်ခဲ့ပြီး စစ်ကောင်စီတပ်ဖွဲ့ဝင် ၆ ယောက် သေဆုံး၊ ၂ ယောက် ဒဏ်ရာရပြီး လက်နက်တွေလည်း သိမ်းဆည်း ရရှိခဲ့တယ်လို့ Freedom Revolution For အဖွဲ့ဆီက သိရပါတယ်။
FRF အဖွဲ့ရဲ့ သတင်းပြန်ကြားရေးတာဝန်ခံက “အခုလ အစကလည်း အဲဒီဂိတ်ကို ကျနော်တို့အဖွဲ့ ဝင်တိုက်ခဲ့သေးတယ်။ အခုက မနေ့ကတည်းက အခြေအနေ စောင့်ကြည့်ပြီး ဝင်တိုက်ခဲ့တာ။ ၄ ကောင်သေတာကို ပစ်ခတ်ချိန်မှာ မြင်ခဲ့ရတာ။ ၂ ကောင်က ဆေးရုံမှာသေတဲ့သတင်း ကြားရတယ်” လို့ ပြောပါတယ်။
အပြန်အလှန် ပစ်ခတ်တိုက်ခိုက်မှုဟာ နာရီဝက်လောက်ကြာခဲ့ပြီး ၇၉ သေနတ် ၁ လက်၊ ၇၉ ကျည် ၇ လုံး၊ G3 သေနတ် ၁ လက်၊ G3 ကျည်ကတ် ၆ ခု၊ ၇ ဒသမ ၆၂ ကျည် အတောင့် ၁၀၀ ကို သိမ်းဆည်းရမိခဲ့တယ်လို့ ဆိုပါတယ်။
စစ်ကောင်စီကိုထောက်ခံတဲ့ တယ်လီဂရမ်ချန်နယ်တွေမှာတော့ အဲဒီ စစ်ဆေးရေးဂိတ် တိုက်ခိုက်ခံရပြီး ရဲအုပ် ၁ ယောက်နဲ့ ရဲတပ်သား ၁ ယောက် သေဆုံးခဲ့ပြီး နောက်ထပ် ရဲတပ်သား ၂ ယောက်လည်း ဘုတလင်ဆေးရုံကြီးမှာ သေနတ်ကျည်ထိမှန် ဒဏ်ရတွေနဲ့ ဆေးဝါးကုသမှုခံနေရတယ်လို့ ဖော်ပြထားပြီး ဒီဗွီဘီအနေနဲ့ သေဆုံးသတင်းကို သီးခြား အတည်မပြုနိုင်သေးပါဘူး။
အဲဒီတိုက်ခိုက်မှုကို Freedom Revolution Force (FRF)၊ ရွှေဘိုခရိုင်တပ်ရင်း ၂၄၊ မဟူရာနတ်ဆိုး အဖွဲ့တို့ ပူးပေါင်း တိုက်ခိုက်ခဲ့တာဖြစ်ပြီး ပြည်သူ့ကာကွယ်ရေး တပ်ဖွဲ့ဝင်တွေ ထိခိုက်မှုမရှိဘဲ ဆုတ်ခွာနိုင်ခဲ့တယ်လို့ ဆိုပါတယ်။
စက်တင်ဘာ ၇ ရက်နေ့ကလည်း အဲဒီလုံခြုံရေးဂိတ်ကို FRF အဖွဲ့က ပစ်ခတ်တိုက်ခိုက်ခဲ့သေးပြီး စစ်ကောင်စီတပ်ဖွဲ့ဝင် ၃ ယောက် သေဆုံး၊ BA ၉၄ သေနတ် ၁ လက် သိမ်းဆည်းရရှိခဲ့တယ်လို့ သိရပါတယ်။
Photo Freedom Revolution Force
