ကရင်အမျိုးသားအစည်းရုံး၊ ဖာပွန်ခရိုင် တပ်မဟာ ၅ နယ်မြေက စစ်ကောင်စီရဲ့ ခေးပူတပ်စခန်းကို KNU တပ်မဟာ ၅ နဲ့ ပူးပေါင်းတပ်ဖွဲ့ဝင်တွေက တိုက်ခိုက် သိမ်းပိုက်နိုင်ခဲ့ပြီး လေကြောင်းကနေ တိုက်ခိုက်လာတာကြောင့် ကျောင်းသား ၃ ယောက်နဲ့ ကျောင်းဆရာ ၁ ယောက်သေဆုံးသွားပါတယ်။
စစ်ကောင်စီတပ်ဘက်က အသေအဆုံးများသလို လက်နက်ခဲယမ်းတွေ အများကြီး ရထားပြီး KNLA၊ PDF ပူးပေါင်းဘက်ကလည်း ထိခိုက်တာတွေရှိတာကြောင့် အသေးစိတ်ကို မသိရသေးဘူးလို့ ဆိုပါတယ်။
တပ်မဟာ ၅ တာဝန်ရှိသူက "စက်တင်ဘာ ၆ ရက်နေ့ မနက် ၅ နာရီခွဲမှာ စတင်တိုက်ခိုက်ခဲ့ပြီး မနက် ၇ နာရီ ၂၀ မိနစ်အချိန်မှာ စခန်းကို တိုက်ခိုက် သိမ်းပိုက်နိုင်ခဲ့တယ်” လို့ ပြောပါတယ်။
ကရင်အမျိုးသားလွတ်မြောက်ရေးတပ်မတော် (KNLA)၊ အထူးတပ်ဖွဲ့၊ ပူးပေါင်း တပ်ဖွဲ့တွေက ဖာပွန်မြို့နယ်အခြေစိုက် စစ်ကောင်စီရဲ့ ခေးပူတပ်စခန်းကို သိမ်းပိုက်ခဲ့တာ ဖြစ်ပြီး စစ်ကောင်စီဘက်က လေကြောင်းကနေ ၆ ကြိမ် ထက်မနည်း တိုက်ခိုက်ခဲ့တယ်လို့ တပ်မဟာ ၅ ရဲ့ ပြောရေးဆိုခွင့်ရှိသူက ပြောပါတယ်။
စစ်တပ်စခန်းကိုသိမ်းပြီး နောက်တရက်အကြာ စက်တင်ဘာ ၇ ရက်မှာ လယ်မူပလောရွာ အုပ်စုက ကော်ရိုဘောထာရွာ၊ ခေးပူရွာအုပ်စုက သေသူးခီးရွာ၊ ပေးကေးကျေးရွာအုပ်စုက ဒေဘူးနိုရွာနားကို စစ်ကောင်စီက တိုက်လေယာဉ် ၂ စင်းနဲ့ ဗုံးကြဲတိုက်ခိုက်ခဲ့တာဖြစ်ပြီး ပြည်သူတွေ ထိခိုက်ဒဏ်ရာရခဲ့တယ်လို့ သိရပါတယ်။
ဖာပွန်ခရိုင်၊ ဒွယ်လိုးမြို့နယ်၊ နားကိုခီးရွာအုပ်စုက ထီးဂေါ်ထာရွာကို ဗုံးကြဲ တိုက်ခိုက်ခဲ့တာမှာတော့ ကျောင်းသားကလေးငယ် ၃ ယောက်နဲ့ ကျောင်းဆရာ ၁ ယောက်တို့ သေဆုံးပြီး ၇ ယောက် ဒဏ်ရာရသွားပါတယ်။
KNU တပ်မဟာ ၅ ရဲ့ တာဝန်ရှိသူက “ဒေသခံတွေက ကြောက်လန့်ပြီး ထွက်ပြေး တိမ်းရှောင်ရတာ။ တောထဲတောင်ထဲဘက်ကို၊ မိုးကလည်းရွာပြန်တော့ နေဖို့ စားသောက်ဖို့၊ ကျန်းမာရေးအတွက် ဆေးဝါးတွေလိုအပ်ချက်တွေ ရှိကြတယ်” လို့ ပြောပါတယ်။
စက်တင်ဘာ ၆ ရက်က လေကြောင်းတိုက်ခိုက်မှုမှာလည်း အမျိုးသား ၁ ယောက် ဒဏ်ရာရခဲ့ပြီး နေအိမ်၊ စာသင်ကျောင်းနဲ့ ဘုရားကျောင်းတို့ ပျက်စီးခဲ့တယ်လို့ သိရပါတယ်။
