ကချင်ပြည်နယ်၊ လိုင်ဇာမြို့တဝိုက်နဲ့ ဒေါ့ဖုန်းယန်မြို့ထဲကို စစ်ကောင်စီတပ်တွေက မနေ့ညက လက်နက်ကြီးတွေနဲ့ ပစ်ခတ်ခဲ့တာကြောင့် ကျောင်းဆရာမ ၂ ယောက် ဒဏ်ရာရသွားတယ်လို့ ဒေသခံတွေက ပြောပါတယ်။

ဗန်းမော်ခရိုင်၊ ဒေါ့ဖုန်းယန် အခြေစိုက် ခလရ ၁၄၂ တပ်ရင်းစခန်းက ဒေါ့ဖုန်းယန်မြို့ထဲကို လက်နက်ကြီးနဲ့ ရမ်းသမ်းပစ်ခတ်တာကြောင့် ဒေါ့ဖုန်းယန် အထက်တန်း ကျောင်းဝင်းထဲက ဝန်ထမ်းတွေနေထိုင်တဲ့ အိမ်နားကို လက်နက်ကြီး ကျရောက် ပေါက်ကွဲခဲ့ပြီး ဆရာမ ၂ ယောက် ထိခိုက်ဒဏ်ရာရသွားတယ်လို့ ကနဦးအနေနဲ့ သိရပါတယ်။

အလယ်တန်းပြဆရာမ ဒေါ်ခင်သန်းဝေနဲ့ မူလတန်းပြဆရာမ ဒေါ်အေးချမ်းဖြိုးတို့ ဒဏ်ရာရခဲ့လို့ ဆေးကုသမှုခံယူနေတယ်လို့ ဒေသခံက ပြောပြီး တခြား ရင်းမြစ်တခုကတော့ တယောက်သေဆုံး၊ တယောက်ဒဏ်ရာရတယ်လို့  ပြောဆိုပေမယ့် အတည်မပြုနိုင်သေးဘဲ ဆက်လက်စုံစမ်းနေတုန်းဖြစ်ပါတယ်။

ပြီးတော့ မနေ့ည ၇ နာရီလောက်မှာ စစ်ကောင်စီရဲ့ လက်နက်ကြီးအထိုင်စခန်းဖြစ်တဲ့ ခယာဘွမ်တောင်ပေါ်ကနေ လိုင်ဇာမြို့တဝိုက်ကို လက်နက်ကြီးတွေပစ်ခတ်ခဲ့လို့ အရပ်သားနဲ့ စစ်ရှောင်တွေ စိုးရိမ်ထိတ်လန့်ခဲ့ကြရတယ်လို့ ဒေသခံတယောက်က ပြောပါတယ်။

လိုင်ဇာဒေသခံတယောက်က “ညနေဘက် မှောင်ခါစပဲရှိသေးတယ်။ လက်နက်ကြီးသံတွေ ညံသွားတာပဲ။ နီးလည်းနီးတယ်။ ၁၀ လုံးထက်တော့မနည်းဘူး။ လမ်းပေါ်မှာ လူတွေတောင်ရှင်းသွားတာပဲ” လို့ ပြောပါတယ်။

စစ်အင်အားအလုံးအရင်းနဲ့ နမ်ဆန်ယန်၊ ဒေါ့ဖုန်းယန်ကို ဝင်ရောက်နေတဲ့ စစ်ကောင်စီတပ်ဖွဲ့ရဲ့ ထောက်ပို့ယာဉ်တန်းတွေဟာ စက်တင်ဘာ ၆ ရက်နေ့ကစပြီး ပိတ်ဆို့ တိုက်ခိုက်ခံရတာကြောင့် အထိခိုက်များနေတယ်လို့လည်း ဒေသတွင်း သတင်းရင်းမြစ်က ပြောပါတယ်။

စက်တင်ဘာ ၆ ရက်က ဂျာပူရွာအနီးမှာဖြစ်ပွားတဲ့ တိုက်ပွဲနဲ့ စက်တင်ဘာ ၇ ရက် ဒေါဖုန်းယန်မှာ ဖြစ်ပွားတဲ့ တိုက်ပွဲတွေမှာ စစ်ကောင်စီရဲ့ ၃၆ စင်းပါ ထောက်ပို့ယာဉ်တန်းဟာ ကချင်လွတ်မြောက်ရေးတပ် KIA ရဲ့ အပြင်းအထန် တိုက်ခိုက်တာကိုခံရတာကြောင့် အသေအပျောက်များနေပြီး ယာဉ်တန်းပြန်ထွက်နိုင်ဖို့ လက်နက်ကြီးပစ်ကူကို အဓိက အားထားနေရတာဖြစ်ပါတယ်။

ဇူလိုင် ၃ ရက်က စတင်ပြီး နမ်ဆန်ယန်နဲ့ အနီးတဝိုက်ကို ခြေကုပ်ရယူဖို့ အင်အားတိုးချဲ့လာတဲ့ စစ်ကောင်စီတပ်တွေကို ကချင်လွတ်မြောက်ရေးတပ် KIA က ဒေါ့ဖုန်းယန်၊ အောင်ဂျာ၊ ခလား၊ မဒီးယန် စတဲ့နေရာတွေမှာ အသာစီးရယူ ပိတ်ဆို့ တိုက်ခိုက်ထားတာကြောင့် စစ်ကောင်စီတပ်တွေပိတ်မိနေပြီး စစ်ရေးအရ တင်းမာနေလို့ ပြည်သူတွေအသုံးပြုနေတဲ့ မြစ်ကြီးနား-ဗန်းမော် လမ်းကြောကိုလည်း အသုံးပြုသူ နည်းပါးသွားပြီး ဒေသတွင်းရောင်းဝယ်ဖောက်ကားတဲ့ ကုန်စျေးနှုန်းတွေ မြင့်တက်နေပါတယ်။